Skandal në Itali: Policë të korruptuar shisnin të dhëna sekrete të VIP-ave, futbollistëve dhe këngëtarëve

Një hetim i madh i Prokurorisë së Napolit ka zbuluar një rrjet të organizuar policësh dhe agjencish private, që dyshohet se kanë shitur informacione konfidenciale për persona të njohur, duke përfshirë sipërmarrës, këngëtarë, futbollistë dhe figura të spektaklit. Sipas autoriteteve italiane, dy efektivë policie kanë kryer qindra mijëra hyrje të paligjshme në databazat e forcave të rendit për të marrë të dhëna të rezervuara, të cilat më pas shiteshin kundrejt pagesës tek agjenci investigative private.

Operacioni, i koordinuar nga Prokuroria e Napolit nën drejtimin e prokurorit Nicola Gratteri, në bashkëpunim me Prokurorinë Kombëtare Antimafia, çoi në lëshimin e 30 masave të sigurisë. Si rrjedhojë 4 persona u arrestuan dhe u dërguan në burg, 6 u vendosën në arrest shtëpie, ndërsa ndaj 19 të tjerëve u morën masa detyrim paraqitjeje.

Hetuesit zbuluan se ekzistonte edhe një “tarifë” për informacionet e kërkuara. Çmimet varionin nga 6 deri në 25 euro për çdo kërkim në databazat shtetërore. Njëri prej policëve dyshohet se ka kryer rreth 600 mijë kontrolle të paautorizuara, ndërsa tjetri mbi 130 mijë, pa asnjë lidhje me detyrën zyrtare. Gjatë hetimeve u sekuestrua edhe një server ku grumbulloheshin të dhënat e marra ilegalisht.

Prokurori Gratteri deklaroi se informacionet sekrete kanë vlerë të madhe ekonomike, sidomos kur përdoren në konflikte ligjore apo interesa private. Sipas tij, tregu i trafikut të paligjshëm të informacionit në Itali është “shumë aktiv”. Hetimi përfshin disa qytete italiane, mes të cilave Napoli, Romë, Ferrara, Belluno dhe Bolzano. Autoritetet po vazhdojnë verifikimet për mënyrën se si janë përdorur të dhënat dhe për personat e tjerë të përfshirë në skemë.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)