Mezi priti fundin e armëpushimit, Rusia bombardon ashpër Ukrainën

Rusia ka ndërmarrë një sulm të fuqishëm ajror ndaj kryeqytetit ukrainas, Kiev, gjatë natës, vetëm pak orë pas përfundimit të armëpushimit treditor. Sipas mediave ukrainase, forcat ruse përdorën dronë luftarakë dhe raketa balistike, duke shkaktuar shpërthime të forta në disa zona të qytetit.

Banorët e Kievit raportuan se alarmet ajrore ranë për disa orë radhazi, ndërsa sistemet ukrainase të mbrojtjes ajrore hynë menjëherë në funksion për të interceptuar dronët dhe raketat që po afroheshin drejt kryeqytetit.

Sipas kreut të administratës ushtarake të Kievit, Timur Tkachenko, nga sulmet ka humbur jetën të paktën një person, ndërsa 16 të tjerë janë plagosur. Shumica e të plagosurve janë dërguar në spital për trajtim mjekësor.

Sulmet shkaktuan dëme të mëdha materiale, sidomos në periferi të Kievit, ku disa ndërtesa banimi u shembën pjesërisht nga shpërthimet dhe zjarret e shkaktuara pas goditjeve.

Ekipet e emergjencës dhe zjarrfikësit punuan gjatë gjithë natës për të nxjerrë banorët nga ndërtesat e dëmtuara dhe për të shuar flakët.

Përfundimi i armëpushimit treditor ka ngritur frikën për një përshkallëzim të ri të konfliktit, ndërsa të dyja palët vazhdojnë operacionet ushtarake në fronte të ndryshme.

Autoritetet ukrainase kanë dënuar ashpër sulmet, duke i cilësuar ato si “akte terrori ndaj civilëve”, ndërsa komuniteti ndërkombëtar po ndjek me shqetësim zhvillimet e fundit.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)