Emiratet e Bashkuara Arabe mohojnë vizitën sekrete të Netanyahut, Irani: Armiqësia ndaj nesh, bast i rrezikshëm

Emiratet e Bashkuara Arabe kanë përgënjeshtruar zyrtarisht raportimet për një vizitë sekrete të kryeministrit izraelit Benjamin Netanyahu në territorin e tyre, duke i cilësuar lajmet si të pavërteta.

Përmes agjencisë shtetërore WAM, autoritetet arabe deklaruan se nuk ka pasur asnjë vizitë të Netanyahut dhe as pritje të ndonjë delegacioni ushtarak izraelit në vend gjatë luftës me Irani. Emiratet po ashtu iu bëjnë thirrje mediave të tregohen të kujdesshme dhe të mos publikojnë informacione të pakonfirmuara që, sipas tyre, mund të përdoren për të krijuar tensione politike në rajon.

Mohimi vjen pasi ministri i Jashtëm iranian, Abbas Araghchi, reagoi ashpër ndaj raportimeve për takimin e pretenduar mes Netanyahut dhe zyrtarëve arabë.

Në një postim në rrjetin social X, Araghchi deklaroi se “armiqësia ndaj popullit iranian është një bast i rrezikshëm”, ndërsa paralajmëroi se çdo bashkëpunim me Izraelin kundër Iranit do të konsiderohej “i pafalshëm”.

“Personat që bashkëpunojnë me Izraelin për të përçarë rajonin do të mbajnë përgjegjësi,” shkroi ai, duke shtuar se shërbimet iraniane të sigurisë kishin paralajmëruar prej kohësh për lëvizje të tilla.

Lajmi është konfirmuar nga burime për mediat amerikane, ndërsa më vonë zyra e Netanyahut pranoi zyrtarisht udhëtimin, duke e cilësuar atë si një “përparim historik” në marrëdhëniet mes dy vendeve.

Në të njëjtën kohë, në Uashington pritet të zhvillohet një raund i ri bisedimesh mes zyrtarëve të Izraelit dhe Libanit, i ndërmjetësuar nga SHBA, ndërsa tensionet mes Izraelit dhe Hezbollahut vazhdojnë të përshkallëzohen.

Sipas mediave amerikane, delegacionet e të dy vendeve janë zgjeruar me përfaqësues të rinj diplomatikë dhe ushtarakë, në një përpjekje për të shmangur shembjen e armëpushimit të brishtë përgjatë kufirit libanez.

Ndërkohë, autoritetet iraniane vazhdojnë të akuzojnë Izraelin për përpjekje destabilizuese në rajon, ndërsa frika për një përplasje më të gjerë rajonale mbetet e lartë.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)