BE po mendon të aplikojë një biletë të vetme për udhëtimet me tren

Komisioni Evropian ka prezantuar një paketë të re reformash që synon të ndryshojë rrënjësisht mënyrën se si qytetarët udhëtojnë me tren në Evropë.

Nisma, e quajtur “Paketa për Pasagjerët”, parashikon krijimin e një sistemi unik biletarie për udhëtimet hekurudhore, duke u dhënë pasagjerëve më shumë transparencë, zgjedhje dhe mbrojtje gjatë udhëtimeve ndërkombëtare.

Zëvendëspresidenti ekzekutiv i Komisionit Evropian, Raffaele Fitto, deklaroi se fokusi i reformës është vendosur tashmë tek nevojat e qytetarëve, duke theksuar se pasagjerët e trenave meritojnë të njëjtën eksperiencë dhe lehtësi që ofrohet sot në transportin ajror.

Paketa përfshin tre propozime ligjore që lidhen me biletarinë hekurudhore, shërbimet multimodale dhe të drejtat e pasagjerëve. Qëllimi kryesor është që udhëtarët të mund të kërkojnë, krahasojnë dhe blejnë bileta për udhëtime me operatorë të ndryshëm hekurudhorë përmes një transaksioni të vetëm dhe në një platformë të vetme, qoftë ajo e pavarur apo e menaxhuar nga një kompani hekurudhore.

Slogani i reformës është “Një udhëtim, një biletë, të drejta të plota”.

Në qendër të reformës janë edhe kompanitë tradicionale hekurudhore, shumë prej të cilave kanë qenë ish-monopole shtetërore. Sipas Komisionit Evropian, tregu hekurudhor vazhdon të mbetet i fragmentuar dhe me pak konkurrencë, ndërsa transformimi digjital në shitjen e biletave ka qenë i ngadaltë. Për këtë arsye, operatorët që kontrollojnë mbi 50 për qind të tregut kombëtar do të detyrohen të përfshijnë në platformat e tyre edhe ofertat e kompanive konkurruese dhe, me kërkesë, të shesin biletat e tyre.

Komisioneri evropian për Transportin, Apostolos Tzitzikostas, e cilësoi paketën si një “ndryshim të madh” për transportin hekurudhor në Evropë. Sipas tij, vlerësimet tregojnë se reforma mund të sjellë ulje të çmimeve të biletave dhe një rritje me rreth 5 për qind të numrit të qytetarëve që zgjedhin të udhëtojnë me tren.

Reforma synon gjithashtu të forcojë të drejtat e pasagjerëve në rastet e vonesave apo humbjes së lidhjeve mes trenave të operatorëve të ndryshëm. Nëse një pasagjer udhëton, për shembull, nga Milano në Paris dhe më pas drejt Brukselit me një biletë të vetme, ai do të mbrohet edhe në rast se vonesa e trenit të parë shkakton humbjen e lidhjes tjetër. Në këto raste, kompania përgjegjëse për vonesën do të duhet të garantojë asistencë, riprenotim ose kompensim financiar për udhëtarin.

Megjithatë, paketa ka shkaktuar reagime të ndryshme në sektor. Shoqata e Kompanive Hekurudhore dhe të Infrastrukturës Evropiane paralajmëroi se rregullat e reja mund të favorizojnë platformat e mëdha digjitale dhe të rrisin komisionet, duke ndikuar në çmimin e biletave.

Paketa do të shqyrtohet tashmë nga Parlamenti Evropian dhe Këshilli i Bashkimit Evropian. Nëse miratohet, kompanitë dhe platformat hekurudhore do të kenë 12 muaj kohë për t’u përshtatur me rregullat e reja.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)