Për herë të parë në 35 vjet, një avion europian u ul në aeroportin e Bagdadit

Një avion i kompanisë greke “Aegean Airlines” nga  Athina u ul sot në aeroportin ndërkombëtar të Bagdadit, duke regjistruar fluturimin e parë direkt të operuar nga një transportues evropian drejt kryeqytetit irakian në 35 vjet.

Ministria e Transportit në Irak njoftoi se ky është "një hap vendimtar, që shënon fillimin e një faze të re rimëkëmbjeje për sektorin e aviacionit irakian dhe kthimin e tij në hartën evropiane të aviacionit".

Linjat ajrore evropiane nuk kanë fluturuar direkt në Aeroportin Ndërkombëtar të Bagdadit për arsye sigurie që nga fillimi i viteve 1990, kur Sadam Huseini, i cili sundoi Irakun nga viti 1979 deri në vitin 2003, pushtoi Kuvajtin fqinj. Regjimi i Sadam Huseinit u rrëzua nga pushtimi i udhëhequr nga SHBA-të në vitin 2003.

Megjithatë, pas dekadash lufte civile, konfliktesh fisnore dhe sulmesh xhihadiste, Iraku ka filluar të rifitojë njëfarë stabiliteti dhe autoritetet po punojnë për të tërhequr investime të huaja për të nxitur ekonominë e vendit.

“Linja Bagdad-Athinë-Bagdad do të operohet me dy fluturime në javë, me mundësinë e shtimit të më shumë në varësi të kërkesës”, tha ministria.

Më herët këtë vit, Aegean Airlines nisi fluturime për në Erbil, kryeqytetin e rajonit autonom të Kurdistanit në Irakun verior, i cili paraqitet si një oaz stabiliteti relativ në vend.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)