Teherani i dha garanci fqinjëve por vijon sulmet, vendet e Gjirit Persik interceptojnë dronët iranianë

Pavarësisht garancive të dhëna nga presidenti Pezeshkian, Irani ka vijuar sulmet ndaj shteteve fqinje. Nga Gjiri Persik vijnë raportime të shumta për sulme masive me dronë dhe raketa, të cilat kanë pasur në shënjestër objekte strategjike dhe baza ushtarake në disa shtete.

Ushtria e Iranit ka deklaruar në një komunikatë se marina e saj ka ndërmarrë një valë të gjerë operacionesh me dronë të armatosur ndaj bazave amerikane në Abu Dhabi dhe në Kuvajt. Sipas njoftimit, operacionet janë kryer me intensitet të lartë në orët e para të mëngjesit.

Ndërkohë, forcat e armatosura të Arabinë Saudite njoftuan se kanë interceptuar dhe shkatërruar 16 dronë, që po drejtoheshin drejt fushës së madhe të naftës në Shaybah Oil Field. Ministria e Mbrojtjes nuk ka konfirmuar origjinën e mjeteve ajrore, por dyshohet se mund të kenë lidhje me aktorë të mbështetur nga Teherani. Ky vend është një nga prodhuesit kryesorë të naftës në Lindjen e Mesme, me rreth një milion fuçi në ditë dhe kishte qenë më parë objekt sulmi në vitin 2019.

Në Katar, autoritetet e mbrojtjes ajrore raportuan se kanë interceptuar një sulm me raketa, duke parandaluar goditjen e territorit të tyre. Ministria e Mbrojtjes në Doha konfirmoi se objektivi ishte territori i shtetit, pa dhënë detaje të tjera.

Po ashtu, në Bahrein u raportua interceptimi i dy raketave dhe një droni. Sipas autoriteteve, që prej fillimit të përshkallëzimit të konfliktit pas operacioneve të Shteteve të Bashkuara dhe Izraelit kundër Iranit, janë interceptuar gjithsej 86 raketa dhe 148 dronë mbi hapësirën ajrore të vendit.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)