“Kriza apokaliptike”: Tharja e lumit në Lindjen e Mesme, që lidhet me profecitë biblike për fundin e botës

Të dhënat satelitore kanë konfirmuar se lumi Eufrat ka humbur mbi 140 kilometra kub ujë që nga viti 2003, duke ngritur alarmin për një krizë të rëndë mjedisore në Lindjen e Mesme. Sipas studiuesve, nëse ritmet aktuale vazhdojnë, lumi mund të përballet me tkurrje drastike e ndoshta edhe tharje totale deri në vitin 2040. Fenomeni ka ndezur debatet në rrjetet sociale edhe mes grupeve fetare, pasi në Librin e Zbulesës përmendet se tharja e lumit Eufrat do të “hapë rrugën” për betejën e fundit, të njohur si “Armagedoni”.

Shumë besimtarë e kanë lidhur situatën aktuale me profecitë biblike për fundin e botës. Megjithatë, ekspertët e klimës dhe studiuesit e fesë theksojnë se nuk ka prova shkencore që e lidhin tharjen e lumit me ngjarje apokaliptike. Sipas tyre, arsyeja kryesore e rënies dramatike të nivelit të ujit lidhet me ndryshimet klimatike, thatësirat ekstreme dhe ndërtimin e digave të mëdha në Turqi, Siri dhe Irak.

Lumi Eufrat konsiderohet një nga burimet më të rëndësishme të ujit në rajon dhe ka qenë jetik për miliona banorë prej mijëra vitesh. Ulja e prurjeve ka ndikuar drejtpërdrejt në bujqësi, furnizimin me ujë dhe prodhimin e energjisë elektrike, veçanërisht në Irak dhe Siri, ku kriza e ujit po përkeqësohet nga konfliktet dhe infrastruktura e dëmtuar.

Ekspertët paralajmërojnë se, nëse nuk merren masa për menaxhimin e burimeve ujore dhe reduktimin e efekteve të ndryshimeve klimatike, rajoni mund të përballet me pasoja të rënda ekonomike dhe humanitare në dekadat e ardhshme.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)