Inteligjenca ukrainase: Lideri çeçen probleme të rënda me veshkat, familja mblidhet në spital

Gjendja shëndetësore e udhëheqësit të Republikës Çeçene, Ramzan Kadyrov, dyshohet se është përkeqësuar dhe disa media raportojnë se ai është në dializë për shkak të probllemeve të rënda me veshkat. Informacioni bazohet në burime nga Drejtoria Kryesore e Inteligjencës e Ministrisë së Mbrojtjes së Ukrainës (DIU), siç shkruan Ukrainska Pravda.

Sipas këtyre burimeve, thuhet se Kadyrov ndodhet në spitalin e tij privat në Çeçeni, ku janë mbledhur anëtarët e familjes së tij, përfshirë të afërmit që kanë mbërritur nga jashtë vendit. Ky zhvillim ka nxitur më tej spekulimet rreth seriozitetit të gjendjes së tij shëndetësore.

Shërbimi i inteligjencës ushtarake ukrainase deklaron gjithashtu se, në sfondin e përkeqësimit të shëndetit të udhëheqësit çeçen, bisedimet për një pasardhës të mundshëm në krye të Çeçenisë po intensifikohen. Në këtë kontekst, u përdor formulimi ironik se Kadyrov po "qëndron në hyrje të sallës së koncerteve të Josif Kobzon", një shprehje e përdorur në zhargonin politik rus dhe ukrainas si një aludim sarkastik për vdekjen ose rrezikun e afërt për jetën, pasi Josif Kobzon, një këngëtar i famshëm rus dhe mbështetës i hapur i Kremlinit, vdiq në vitin 2018.

Shërbimi i Inteligjencës së Mbrojtjes së Ukrainës ka raportuar më parë disa herë për gjendjen e rëndë dhe madje terminale shëndetësore të Ramzan Kadyrov, duke përfshirë deklaratat zyrtare të përfaqësuesve të tij.

Kështu, më 15 shtator 2023, zëdhënësi i DIU-së, Andriy Yusov, deklaroi se Kadyrov ishte në një gjendje jashtëzakonisht të rëndë shëndetësore. Dy ditë pas kësaj deklarate, në rrjetet sociale u shfaq një video e Ramzan Kadyrov, e cila më pas u interpretua si një përpjekje për të mohuar akuzat në lidhje me shëndetin e tij.

Megjithatë, raportet e reja e kanë rihapur çështjen e aftësisë së tij për të mbajtur pushtetin dhe tranzicionin e mundshëm të pushtetit në Çeçeni.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)