500 ushtarë, helikopterë dhe dronë, “Kopshtari” zbulohet i fshehur në kanal, krahu i djathtë i “El Mencho”

Një operacion i madh ushtarak në Meksikë ka çuar në arrestimin e një prej figurave kryesore të kartelit të fuqishëm Jalisco New Generation, i njohur si një nga organizatat më të rrezikshme kriminale në vend.

Audias Flores Silva, i njohur me nofkën “Kopshtari”, u kap pas një operacioni që zgjati 19 muaj ndjekje dhe përfshiu mbi 500 ushtarë, helikopterë dhe mjete ajrore. Pamjet e publikuara nga autoritetet tregojnë momentin kur forcat speciale e zbuluan teksa përpiqej të fshihej në një kanal kullimi, pasi shokët e tij tentuan të shpërqendronin vëmendjen.

Flores konsiderohej krahu i djathtë i liderit të kartelit, Nemesio Oseguera, i njohur si “El Mencho”, i cili u vra në shkurt gjatë një përplasjeje me ushtrinë. Pas vdekjes së tij, Flores ishte ndër emrat kryesorë që mund të merrte drejtimin e organizatës kriminale.

Sipas burimeve të sigurisë, ai kishte një rol të rëndësishëm në krijimin e aleancave mes kartelit Jalisco dhe grupeve të tjera kriminale, përfshirë fraksione të kartelit Sinaloa.

Autoritetet meksikane konfirmuan se gjatë operacionit janë arrestuar edhe persona të tjerë të nivelit të lartë kriminal, ndërsa Flores kërkohet edhe nga Shtetet e Bashkuara për ekstradim.

Në një operacion paralel, është arrestuar edhe një tjetër drejtues bande, Alexander Benavides Flores, i njohur si “R9”, çka shkaktoi bllokime rrugësh nga grupet kriminale në zonën kufitare me SHBA-në.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)