Avioni i “Turkish Airlines” përfshihet nga flakët gjatë uljes në Nepal, evakuohen me shpejtësi 277 pasagjerë

Momente paniku në aeroportin e Katmandusë në Nepal, ku një avion i kompanisë “Turkish Airlines” u përfshi nga flakët gjatë uljes, duke detyruar pasagjerët të evakuohen menjëherë përmes rrëshqitëseve të emergjencës.

Në bord ndodheshin 277 pasagjerë dhe 11 anëtarë ekuipazhi. Sipas autoriteteve të aviacionit civil në Nepal, avioni që kishte nisur fluturimin nga Stambolli mori flakë pasi u shfaq një shkëndijë në sistemin e uljes në anën e djathtë të avionit.

Pamjet e publikuara në rrjetet sociale tregojnë tym të dendur që dilte nga pjesa e djathtë e avionit në momentin që ai prekte pistën në kryeqytetin nepalez. Pas incidentit, ekuipazhi urdhëroi menjëherë evakuimin e pasagjerëve.

Autoritetet konfirmuan se të gjithë personat në bord janë të sigurt dhe nuk ka raportime për viktima apo të lënduar rëndë.

Ngjarja shkaktoi edhe mbylljen për gati dy orë të pistës së vetme të aeroportit të Katmandusë, ndërsa disa fluturime u pezulluan deri në pastrimin e zonës.

Zëvendëspresidenti i “Turkish Airlines”, Yahya Ustun, deklaroi se hetimet teknike kanë nisur dhe se vlerësimet paraprake tregojnë se tymi u shkaktua nga një defekt teknik në një tub hidraulik.

Nepali njihet për aeroportet dhe pistat e vështira për ulje, për shkak të terrenit malor dhe kushteve të komplikuara atmosferike. Në vitin 2015, një tjetër avion i “Turkish Airlines” doli nga pista në Katmandu, duke shkaktuar bllokimin e aeroportit për katër ditë.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)