A do të jetonit në këtë ishull në Greqi? Ofrojnë 500 euro bonus në muaj nëse zhvendoseni aty

Një ishull i vogël në Greqi ka ndërmarrë një nismë për të luftuar shpopullimin dhe për të tërhequr banorë të rinj. Bëhet fjalë për ishullin Anticitera, i vendosur mes Kretës dhe gadishullit të Peloponezit, i cili ofron 500 euro në muaj për një periudhë trevjeçare për personat që vendosin të zhvendosen dhe të jetojnë atje.

Aktualisht, Anticitera ka vetëm 45 banorë të përhershëm, shumica mbi moshën 50 vjeç, çka ka shtyrë autoritetet lokale të ndërmarrin masa konkrete për të shmangur rrezikun e zhdukjes së komunitetit. Programi synon veçanërisht të tërheqë familje të reja, me qëllim ringjalljen e jetës sociale dhe rikthimin e energjisë rinore në ishull.

Sipas përfaqësuesve lokalë dhe mediave ndërkombëtare, nisma fokusohet në profesione të caktuara si bukëpjekës, peshkatarë dhe familje me fëmijë. Përveç ndihmës financiare mujore, paketa përfshin edhe mbështetje për shkollimin e fëmijëve, kurse të gjuhës greke dhe asistencë për integrimin e plotë të banorëve të rinj në komunitetin lokal.

Kryetari i bashkisë, Andreas Harhalakis, ka theksuar se ishulli ka nevojë urgjente për familje të reja, mjaftueshëm të mëdha që Anticitera të jetë e gjallë dhe të mbushet sërish me zëra fëmijësh.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)