Zbulimi i jashtëzakonshëm në majën më të lartë të botës

Një zbulim i rrallë shkencor në malin më të lartë të botës ka hedhur dritë mbi historinë e lashtë të planetit. Studiuesit kanë gjetur fosile organizmash detarë rreth 450 milionë vjeçarë pranë majës së Everestit, duke treguar se kjo zonë dikur ka qenë fundi i një oqeani tropikal.

Sipas ekipit të kërkuesve, fosilet janë zbuluar në një lloj shkëmbi sedimentar të njohur si gëlqerorja e Qomolangmës. Këto shkëmbinj, që sot ndodhen në lartësi mbi 4 mijë metra, janë formuar fillimisht në mjedise detare. Brenda tyre shkencëtarët kanë identifikuar mbetje të organizmave të lashtë detarë, si krinoidë, trilobitë, cefalopodë dhe brakipodë, specie që jetonin në detra të ngrohtë dhe të cekët miliona vite më parë.

Këto krijesa kanë jetuar në Oqeanin e lashtë Tetis, i cili dikur mbulonte një pjesë të madhe të rajonit ku sot ndodhet vargmali i Himalajeve. Me kalimin e kohës, sedimentet ku u varrosën mbetjet e tyre u shndërruan në shkëmbinj, të cilët sot formojnë një pjesë të majës së Everestit.

Shpjegimi për këtë fenomen lidhet me lëvizjen e pllakave tektonike të Tokës. Rreth 50 milionë vjet më parë, pllaka kontinentale e Indisë filloi të përplasej me pllakën euroaziatike. Përplasja ishte aq e fuqishme sa ngriti dhe palosi shtresa të mëdha sedimentesh detare, duke krijuar vargmalin e Himalajeve dhe duke ngritur gradualisht malin Everest.

Procesi gjeologjik vazhdon edhe sot. Sipas shkencëtarëve, Himalajet vazhdojnë të ngrihen me rreth një centimetër çdo vit për shkak të presionit të vazhdueshëm midis këtyre dy pllakave tektonike.

Prania e fosileve detare në majën e Everestit përbën gjithashtu një provë të rëndësishme për teorinë e lëvizjes së kontinenteve të propozuar nga shkencëtari gjerman Alfred Wegener në vitin 1915. Zbulime të tilla tregojnë se sipërfaqja e Tokës ka ndryshuar vazhdimisht gjatë historisë së saj të gjatë gjeologjike.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)