U pagua 300 euro si figurant në film, pensionisti rrezikoi të humbiste 34 mijë euro

Të ndihesh një yll Hollywood-i, edhe pse vetëm për një ditë dhe të shfaqesh si figurat në film, është ëndrra e të gjithëve. Megjithatë, dëshira të tilla ndonjëherë rrezikojnë të vijnë me kosto të lartë. Këtë mësim e mori edhe një pensionist nga Modena në Itali.

Ai u shfaq si figurant në filmin “Ferrari” të Michael Mann, ku luanin aktorë ndërkombëtarë si Penelope Cruz dhe Adam Driver. Për pjesëmarrjen ai u pagua me 300 euro, të cilat ishin një lloj mbulim i shpenzimeve ditore.

Megjithatë prej asaj pagese të vogël të përfituar, në fund të vitit 2023 Sigurimet Shoqërore në Itali e kishin njoftuar se do ti hiqnin pensionin e përfituar gjatë vitit 2022. Në total bëhej fjalë për afro 34 mijë euro. Argumenti i institucioneve shtetërore lidhej me shkeljen të rregullave të të ardhurave për ata që përfitojnë pension.

62-vjeçari, i cili kishte dalë në pension në vitin 2020 kishte plotë 38 vite kontribute shoqërore. Ai iu drejtua organeve kompetente, duke e kundërshtuar vendimin e Sigurimeve Shoqërore. Por, sipas raportimit të “Corriere di Bologna”, “Sigurimet nuk i dëgjuan argumentet e tij dhe çështja shkoi në gjyq”.

Gjykata Civile e Bolonjës, e rrëzoi përfundimisht kërkesën e Sigurimeve Shoqërore. Gjatë procesit u zbulua se pensionisti nuk kishte “kryer punë sipas kushteve të përcaktuara nga institucionet”: ai kishte shitur të drejtat e imazhit te një kompani pa nënshkruar kontrata pune. Pjesëmarrja e tij në film u konsiderua si “punë e rastësishme autonome, e cila mund të kombinohej me pensionin e tij”.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)