Adoleshenti që refuzoi 250 mijë euro, tani po ndryshon bujqësinë në SHBA

Një adoleshent 16-vjeçar nga SHBA ka tërhequr vëmendjen në teknologji dhe shkencë pasi refuzoi një ofertë prej rreth 250 mijë eurosh për të braktisur shkollën dhe për t’iu përkushtuar biznesit të tij.

Bëhet fjalë për Rudrojas Kunvar, nga Maryland, i cili ka zhvilluar një mjet inovativ të bazuar në inteligjencën artificiale, të quajtur “Evion”, që synon të ndihmojë fermerët në analizimin e gjendjes së kulturave bujqësore.

Pavarësisht ofertës së majme prej 300 mijë dollarësh, i riu vendosi të vazhdojë studimet, duke zgjedhur të ndërtojë projektin e tij paralelisht me shkollën.

Ideja për krijimin e “Evion” lindi pasi Kunvar bisedoi drejtpërdrejt me fermerë, të cilët i treguan se shpesh mbështeteshin në intuitë për të kuptuar nëse bimët ishin të sëmura apo kishin nevojë për trajtim. Kjo e shtyu të ndërtojë një zgjidhje teknologjike më të saktë dhe efikase.

Platforma funksionon duke përdorur imazhe ajrore të marra nga dronë, të cilat analizohen nga algoritme të inteligjencës artificiale. Sistemi gjeneron harta të detajuara ku zonat e shëndetshme shfaqen me ngjyrë jeshile, ndërsa problemet identifikohen me të kuqe.

Kjo u jep mundësi fermerëve të ndërhyjnë vetëm aty ku është e nevojshme, duke kursyer ujë, plehra dhe kosto operative.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)