Takim me byrek e kos, Orban dhe Vuçiç negociojnë për të shpëtuar NIS-in nga sanksionet e SHBA

Kryeministri hungarez Viktor Orban zhvilloi një vizitë të pazakontë në Serbi, në një moment kritik për industrinë serbe të naftës, e goditur rëndë nga sanksionet amerikane. Orban u takua me presidentin Aleksandar Vuçiç në Suboticë, ku temë qendrore e diskutimeve ishte mundësia që kompania energjetike hungareze MOL të blejë aksionet e kompanisë serbe të naftës NIS, e cila aktualisht kontrollohet kryesisht nga kapitali rus.

Shefi i kabinetit të Orbanit konfirmoi se bisedimet për një marrëveshje të tillë janë në zhvillim, ndërsa takimi mes dy liderëve nisi në mënyrë shumë informale me byrek të nxehtë. Vuçiç publikoi foto nga momenti duke shkruar se “miqësia midis Serbisë dhe Hungarisë është më e fortë se protokollet”.

Pas vizitës në fabrikën e birrës “Mićko”, dy burrështetasit shkuan në kantinën e njohur të verës “Zvonko Bogdan” në Paliç. Vuçiç u shpreh se në këtë atmosferë të qetë biseduan për projekte të përbashkëta dhe forcimin e marrëdhënieve dypalëshe, duke theksuar se partneriteti aktual “u sjell përfitime popujve të të dy vendeve”.

Vizita e Orbanit vjen në një kohë kur Serbia po përballet me rrezikun e mbylljes së rafinerisë së saj të vetme të naftës, për shkak të sanksioneve që ndalojnë furnizimin me naftë bruto nëpërmjet tubacionit kroat JANAF. Beogradi i ka dhënë kompanive ruse Gazprom Neft dhe Gazprom 50 ditë afat për të shitur aksionet në NIS, përndryshe qeveria serbe ka paralajmëruar se do të marrë kontrollin e operacioneve.

Orban deklaroi se Hungaria është e interesuar të marrë rol në NIS dhe se do të zhvillojë bisedime për të siguruar furnizime të mjaftueshme me naftë dhe gaz rus, me synimin për të ndihmuar edhe Serbinë. Media hungareze raporton se kryeministri mund të takohet me presidentin rus Vladimir Putin në Moskë, megjithëse Orban nuk e konfirmoi emrin e bashkëbiseduesit të tij.

Shefi i kabinetit të tij, Gergely Gulyas, tha se heqja e pronësisë ruse nga NIS është në interes të kompanisë dhe se MOL mund të marrë një rol më të madh në këtë proces, nëse palët bien dakord.

Aktualisht, Gazprom Neft zotëron 44.9% të aksioneve të NIS, Gazprom 11.3%, Serbia 29.9%, ndërsa pjesa e mbetur ndahet mes aksionarëve të vegjël.

Komente (0)