Shuhet legjenda e Hollivudit, Robert Duvall, fitues i çmimit Oscar

Aktori legjendar amerikan Robert Duvall, fitues i çmimit Oscar dhe një nga figurat më të mëdha të kinemasë botërore, është ndarë nga jeta në moshën 95-vjeçare. Ai ndërroi jetë në shtëpinë e tij në Middleburg, Virxhinia, të dielën, sipas një njoftimi të publikuar nga përfaqësuesit e tij në emër të bashkëshortes, Luciana Pedraza.

Duvall u bë i famshëm në mbarë botën për rolin e Tom Hagen në filmin klasik The Godfather të regjisorit Francis Ford Coppola, rol për të cilin mori nominimin e parë për Oscar. Ai e ripërsëriti interpretimin edhe në The Godfather Part II, ndërsa mungoi në pjesën e tretë për shkak të një mosmarrëveshjeje financiare.

Gjatë një karriere që zgjati më shumë se gjashtë dekada, Duvall interpretoi një gamë të gjerë personazhesh, nga oficerë ushtarakë te kauboj dhe figura historike. Ai fitoi çmimin Oscar për aktorin më të mirë për rolin e një këngëtari country në filmin Tender Mercies. Një tjetër rol ikonik ishte ai i kolonelit Kilgore në epopenë e luftës së Vietnamit Apocalypse Now, ku shqiptoi frazën e famshme, “Më pëlqen era e napalmit në mëngjes”.

Në fillimet e tij, ai u shfaq në filmin To Kill a Mockingbird, ndërsa më vonë luajti në prodhime të suksesshme si “Network”, “Lonesome Dove”, “The Apostle” dhe “The Judge”, për të cilin mori një tjetër nominim për Oscar në moshën 84-vjeçare.

Përveç aktrimit, Duvall ishte edhe regjisor dhe skenarist. Ai u vlerësua me Medaljen Kombëtare të Arteve në vitin 2004. I martuar katër herë, prej vitit 2004 ishte bashkëshort i aktores argjentinase Luciana Pedraza.

Familja ka bërë të ditur se nuk do të ketë ceremoni zyrtare mortore, duke inkurajuar admiruesit ta nderojnë kujtimin e tij duke parë një film të mirë ose duke ndarë një histori me miqtë.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)