Humbi ndjenjat në pishinë, ndërron jetë aktorja e njohur franceze

Aktorja franceze Nadia Farès ka ndërruar jetë në moshën 57-vjeçare, pasi u gjet pa ndjenja në një pishinë, në një palestër luksoze në Paris.

Ngjarja ndodhi më 11 prill në një klub të njohur në zonën Blanche–Montmartre. Sipas raportimeve, aktorja kishte qenë duke notuar para se të humbiste ndjenjat dhe u gjet në fund të pishinës. Një tjetër notare i dha ndihmën e parë duke kryer CPR, ndërsa më pas ndërhynë shërbimet e urgjencës.

Farès u transportua në spitalin Pitié-Salpêtrière Hospital, ku u vendos në gjendje kome të induktuar. Ajo nuk arriti të mbijetojë dhe ndërroi jetë të premten, pas një ataku kardiak.

Lajmin e trishtë e konfirmuan vajzat e saj, Cylia dhe Shana Chasman, të cilat shprehën dhimbjen për humbjen. “Me trishtim të madh njoftojmë ndarjen nga jeta të Nadia Farès. Franca ka humbur një artiste të madhe, por për ne, mbi të gjitha, ishte një nënë që sapo humbëm.”

Aktorja lë pas dy vajzat e saj, të cilat i kishte me ish-bashkëshortin, producentin amerikan Steve Chasman. Çifti ishte martuar në vitin 2002 dhe ishte ndarë disa vite më parë.

E lindur në Marok dhe e rritur në jug të Francës, Farès u bë e njohur ndërkombëtarisht me rolin e saj në filmin The Crimson Rivers. Ajo kishte jetuar për një periudhë në SHBA, përpara se të rikthehej së fundmi në Francë.

Në muajt e fundit, aktorja ishte angazhuar në projekte të reja dhe po përgatitej të realizonte filmin e saj të parë si regjisore, një komedi aksioni në bashkëpunim me TF1 Studios.

Farès kishte përballuar edhe sfida të mëdha shëndetësore ndër vite. Në vitin 2007, ajo iu nënshtrua një operacioni në tru për një aneurizëm, ndërsa më parë kishte kryer edhe disa ndërhyrje në zemër.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)