“Po e bëni zv/kryeministër”, avokati zbulon vendndodhjen e Ergys Agasit: Po përdoret politikisht, s’ka prova për tendera

Avokati i biznesmenit Ergys Agasi, Maks Haxhia në një komunikim për mediat pasi doli nga ambientet e Prokurorisë së Posaçme, ka deklaruar se klienti i tij nuk ka përfituar asnjë tender nga buxheti i shtetit dhe nuk ka lidhje me akuzat e ngritura ndaj tij nga SPAK, si pjesë e hetimit për afera me tenderat e Agjencisë Kombëtare të Shoqërisë së Informacionit.

Haxhia sqaroi se sot në SPAK ka tërhequr një dokument në emër të klientit të tij dhe më tej bëri me dije se Agasi ndodhet aktualisht jashtë vendit për arsye biznesi. Sipas tij, sapo të rikthehet në Shqipëri, Agasi do të paraqitet në SPAK për t’u përballur me drejtësinë.

“Nuk ka asnjë provë që zoti Agasi të jetë marrë me tendera. Nuk njihet as me personin që pretendohet se i është hequr liria. Ai nuk është arratisur. Është në një shtet tjetër duke lidhur një marrëveshje biznesi. Kur të kthehet, do të përballet me drejtësinë”, u shpreh Haxhia.

SPAK e ka shpallur në kërkim Ergys Agasin për veprat penale “Konkurrencë e paligjshme nëpërmjet dhunës”, “Shkelje e barazisë së pjesëmarrësve në tendera apo ankande publike” dhe “Heqje e paligjshme e lirisë”, në lidhje me pretendimet për rrëmbimin e biznesmenit Gerond Meçe, me qëllim tërheqjen e tij nga tendera të AKSHI-t.

Por avokati i tij mohoi kategorikisht çdo lidhje të Agasit me AKSHI-n apo me personat e përmendur në dosje. Haxhia theksoi se Agasi është biznesmen dhe nuk ka ushtruar asnjë funksion shtetëror.

“Nuk përputhen veprimtaritë e tij me ato të AKSHI-it. Zoti Agasi nuk ka përfituar asnjë tender nga financat publike, nga taksat dhe tatimet e qytetarëve”, tha ai.

Sa i përket filmimeve të përmendura në hetim, Haxhia tha se ato janë pjesë e një sistemi sigurie, pas tentativave të mëparshme për vjedhje ndaj Agasit. “Nuk regjistrojnë zëra, por vetëm lëvizje”, sqaroi ai.

Në fund, Haxhia akuzoi se çështja po përdoret politikisht dhe se publikimi i kontrolleve dhe hetimeve në media e komprometon SPAK-un.

“Momenti po shfrytëzohet politikisht dhe po shihet Agasi si zv/kryeministër. Të gjitha këto do të ndiqen në rrugë ligjore”, përfundoi ai.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)