Arratisja e Altin Ndocit, 'Audi A7' e priste tek dera e spitalit, polici i Burgjeve e ndoqi dhe qëlloi në ajër

Arratisja spektakolare e Altin Ndocit nga spitali i Durrësit duket se ka qenë e mirëplanifikuar, pasi ai është pritur nga një automjet "Audi A7" dhe më pas është larguar drejt Kavajës. Dy policët që e shoqëruan për kryerjen e kontrollit mjekësor janë shoqëruar nga forcat e rendit.

13.01.2026. 15:48

Arratisja e Altin Ndocit, 'Audi A7' e priste tek dera e spitalit, polici i Burgjeve e ndoqi dhe qëlloi në ajër

Dyshohet se është Kavaja qyteti drejt së cilës është larguar Altin Ndoci, i dënuari i cili u arratis këtë të martë nga reparti infektiv i spitalit të Durrësit. Mësohet se Ndoci është pritur nga një automjet tip “Audi A7” me ngjyrë të bardhë dhe me targa AA700RS në ambientet e jashtme të spitalit, e cila më pas është larguar në drejtim të Spitallës dhe ka humbur gjurmët në zonën e Kavajës.

Forca të shumta policie janë angazhuar për kapjen e Ndocit dhe postblloqe janë ngritur në hyrjet dhe daljet e qyttit të Kavajës, por edhe në Durrës e Tiranë. Bëhet me dije se po kryhen kontrolle në disa pika strategjike në këto tre qytete, ndërsa vëmendje e shtuar e efektivëve është kërkuar për të evidentuar automjetet që përputhen me përshkrimet e dyshuara të përdorura gjatë arratisjes.

Altin Ndoci ishte paraqitur në Spitalin e Durrësit për të kryer një kontroll pasi kishte pasur probleme shëndetësore dhe shoqërohej nga 5 policë. NewsmaxBalkans mëson se njëri prej efektivëve drejtonte automjetin e Drejtorisë së Burgjeve, dy të tjerë qëndruan për të pritur në furgon dhe vetëm dy kryen shoqërimin e të burgosurit në ambientet e spitalit.

Sakaq, Ndoci ka kërkuar që të shkojë në tualet pasi është futur në dhomë dhe sapo ka dalë prej aty e ka goditur efektivin që po e ruante duke ia mbathur me shpejtësi.

Ndërkohë në fotot që po qarkullojnë shihet Ndoci, i cili mban veshur tuta dhe një xhup të zi, duke u larguar me vrap, ndërsa një efektiv policie shihet duke e ndjekur nga pas me armë në dorë. Polici i Burgjeve mësohet se ka qëlluar një herë në ajër me pistoletën e shërbimit gjatë tentativës për të ndalur arratisjen e Ndocit.

Po ashtu mësohet se janë shoqëruar nga forcat e rendit dy policët e Drejtorisë së Burgjeve që kryen shoqërimin dhe mbikëqyrjen e Ndocit brenda amienteve të spitalit.

Duket se Altin Ndoci e kishte mirëmenduar planin për tu arratisur nga spitali i Durrësit. Ai cilësohet si një personash i rrezikshëm dhe ishte vënë në pranga me urdhër të SPAK gjatë operacionit “Plumbi i Artë”, pasi akuzohet se ka marrë pjesë në masakrën e Bradasheshit, ku mbetën të vrarë tre persona.

Shkarkoni aplikacionin Newsmax Balkans:

Komente (0)