Sherr mes dy pronarëve të lokaleve për hapësirat publike, një i plagosur në pazarin e vjetër të Korçës

Një incident i rëndë është regjistruar këtë të premte në Pazarin e Vjetër të Korçës, ku një sherr mes disa personave ka përfunduar me një të plagosur me thikë.  Sipas informacioneve paraprake, konflikti ka shpërthyer mes pronarëve të dy lokaleve, fillimisht me debate dhe tensione verbale, por më pas situata ka dalë jashtë kontrollit duke u kthyer në përleshje fizike.

Gjatë sherrit janë përdorur edhe karrige, duke shkaktuar dëmtime te disa prej të përfshirëve. Në një moment, njëri nga personat e konfliktit ka marrë një mjet prerës nga brenda lokalit dhe ka goditur kundërshtarin, duke e lënë të plagosur në këmbë.

Të paktën tre persona janë dërguar në Spitalin Rajonal të Korçës, ku po marrin ndihmë mjekësore. Burime bëjnë me dije se i plagosuri me thikë ndodhet jashtë rrezikut për jetën, ndërsa të tjerët kanë marrë dëmtime më të lehta.

Nga verifikimet e para, dyshohet se shkak i konfliktit ka qenë një mosmarrëveshje për shfrytëzimin e hapësirës publike, konkretisht për vendosjen e tavolinave dhe karrigeve në zonën përreth lokaleve. Policia ka mbërritur në vendngjarje dhe po punon për sqarimin e plotë të rrethanave, ndërsa pritet që personat e përfshirë të shoqërohen në komisariat për veprime të mëtejshme procedurale.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)