Gara për kreun e PD, Noka sulmon Salianjin: Dera jonë s’do hapet kurrë për ‘Gysin’!

Sekretari i Përgjithshëm i Partisë Demokratike, Flamur Noka komentoi refuzimin që iu bë kandidaturave për kryetar të Ervin Salianjit dhe Alesia Balliut, përfaqësuesve ligjorë të së cilëve ju mbyll dera e selisë blu, duke mos i lejuar të dorëzojnë dokumentacionin për të hyrë në garë.

Edhe pse tha se gara për kryetarin e ri është e hapur për çdo anëtar të PD që ka ambicie për të kandiduar, Noka zbuloi edhe “vijat e kuqe”, duke këmbëngulur se këtë hapje nuk mund ta shfrytëzojnë të gjithë.

Një ndër ata që që përjashtohet sipas Nokës është ish-deputeti Ervin Salianji, të cilin me ironi e quajti “Gysi”, si referencë për biznesmenin e shpallur në kërkim nga SPAK, Ergys Agasi. Madje Noka shkoi edhe më tej duke aluduar se Salianji është administratori i bizneseve që zotëron Agasi.

“Më 13 mars kur kryesia e PD ka marrë vendim për çeljen e garës për kryetar, ju kam komunikuar që gara është hapur dhe besoj që kemi qenë transparent. Tani, ka një muaj, ka patur çdokush që aspiron për të aplikuar dhe ka afat deri në 12 të natës.  Çdo anëtar i Partisë Demokratike që plotëson kriteret. A, ju thoni kur të hapet gara për administratorin e bizneseve të Gysit, atëherë është tjetër gjë. Unë flas për Partinë Demokratike. Apo kur të hapet gara për ndonjë vend surrogato te TV Varikalon, atëherë janë të tjera gjëra. Unë flas për kriteret e partisë dhe për garën e partisë. Dyert... Hajdeni këtu, ja shikojeni dyert. Janë të hapura dyert apo jo? A janë të hapura dyert? Tani, por, ama një gjë do ju sqaroj. Për Gysin nuk ka për të qenë kurrë kjo derë e hapur. Më fal, për mafiozin Varikarlon s'do jetë kurrë... Tani, unë po ju them, për Gysin apo për Varikarlon, kjo derë, më vjen keq... Kur të caktohet gara për administratorin e Gysit, të shkojnë ta aplikojnë të gjithë”, tha Noka.

LEXO MË SHUMË

Politikë

Gara për kreun e PD, një mjeke sfidon Sali Berishën, Salianjit dhe Balliut iu mbyllet dera

Mjekja Mereme Sela do të sfidojë Sali Berishën në garën për kryetar të Partisë Demokratike, pasi zyrtarisht ka dorëzuar dokumentacionin e kandidimit në selinë blu. Dera e selisë blu i është mbyllur përfaqësuesve të Ervin Salianjit dhe Alesia Balliut, por të dy do të dorëzojnë aplikimin me postë.

11:07 3 h më parë30.04.2026.

Autori

Politikë

PD thërret me 30 maj Kuvendin Kombëtar, çel garën për kryetarin

Partia Demokratike ka vendosur thirrjen e Kuvendit Kombëtar më 30 maj 2026, në orën 11:00. Në vendimin e bërë publik, është përcaktuar edhe rendi i ditës.

14:58 1 ditë më parë29.04.2026.

Autori

Më tej ai insistoi se nuk ka asnjë demokrat të cilit i është refuzuar kandidimi, duke insinuuar se Ervin Salianji dhe Alesia Balliu nuk janë më pjesë e Partisë Demokratike.

“Për Partinë Demokratike duhet të jesh pikë së pari demokrat, jo t'i shërbesh Ramës, duhet të jesh njeri që u shërben demokratëve. A ke parë diçka ti, ka ndonjë anëtar i Partisë Demokratike që ka aplikuar dhe i është refuzuar e drejta e aplikimit? Më thoni një. Unë po ju bëj një pyetje. Dini ju që një anëtar i PD-së ka aplikuar dhe nuk i është pranuar aplikimi? Asnjë! A, ju doni që të aplikojë Gysi apo Varikarlo? Nuk ndodh”, deklaroi Noka.

Sa i përket mjekes Mirela Sela, e cila u lejua të hynte në selinë blu duke dorëzuar dokumentet përkatëse për kandidimin përballë Sali Berishës, Noka tha se është anëtare partie.

“Mirela Sela është demokrate. Është anëtare e partisë. Prit, prit. Më fal. Është pritur, ka dorëzuar. A i plotëson kriteret, a s'i plotëson kriteret, është çështje e institucioneve. Por ajo është demokrate dhe absolutisht. Por, ju mund të doni që Edi Rama të sjellë dokumenta për, jo, Gysi, jo, Sueli, jo, më vjen shumë keq. Ka kritere kjo parti. Ka një vijë të kuqe”, theksoi ai.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)