Rama reagon ndaj Berishës: Nuk ka presion ndaj Kushtetueses, po mbroj balancën e pushteteve

Në një video në Facebook, Kryeministri Edi Rama ka hedhur poshtë akuzat e Sali Berishës se po ushtron presion mbi Gjykatën Kushtetuese, duke theksuar se veprimet e tij lidhen vetëm me mbrojtjen e parimeve kushtetuese dhe jo me ndërhyrje në drejtësi.

Berisha e akuzoi Ramën se po i bën presion Gjykatës Kushtetuese për çështjen e pezullimit të ministres Belinda Balluku. Rama sqaroi se ankimin në Kushtetuese e ka bërë personalisht si kryeministër, duke e konsideruar vendimin e GJKKO-së për pezullim si cenim të balancës së pushteteve.

“Presion gjykatës? Kryeministri nuk duhet të flasë për një proces gjyqësor, por unë jam palë në këtë çështje. A e dini kush e ka ankimuar vendimin? E kam ankimuar unë, jo për individin, por për parimin e mosmarrjes së kompetencave të kryeministrit dhe presidentit nga një prokuror apo gjykatës,” u shpreh Rama.

Ai argumentoi se nëse një prokuror apo gjyqtar do të kishte kompetencën të pezullojë një ministër, atëherë krijohet një precedent i rrezikshëm që cenon funksionimin e ekzekutivit dhe rolin ekskluziv të parlamentit për miratimin e qeverisë. “Unë nuk i bëj presion askujt. Flas për publikun dhe për balancën e pushteteve,” shtoi ai.

Duke iu përgjigjur akuzave të Berishës se po manipulon opinionin me referenca të Komisionit të Venecias, Rama tha se “këtu nuk gjendet asnjë rast në Europë që një ministër të pezullohet me vendim gjykate”, duke e quajtur këtë një praktikë që bie ndesh me standardet demokratike.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)