Qiratë e larta, Rama: Do ndërtojmë kampus në Durrës, studentët nga Tirana do vijnë me tren

Në një takim me 40 rektorë të universiteteve publike dhe private në vend, me fokusin e diskutimit tek e ardhmja e arsimit të lartë, Kryeministri Edi Rama adresoi krizën e strehimit të të rinjve, duke ofruar edhe një zgjidhje.

Gjatë fjalës së tij, Rama njoftoi se qeveria po planifikon ndërtimin e komplekseve studentore në Tiranë dhe Durrës, si zgjidhje për çmimet e larta të qirave të banesave.

“Kemi dy kampuse të mëdha përpara: kampusin e Tiranës dhe kampusin e ‘Aleksandër Moisiu’ në Durrës. Me trenin që do të jetë në funksion shumë shpejt, do të jetë shumë e thjeshtë që studentët në Tiranë të strehohen në kampusin e Durrësit, duke ndihmuar në zgjidhjen e problemit të çmimeve të larta”, tha kryeministri.

“Të gjithë të ulemi dhe ta shikojmë gjënë në sy. Sfida është dhe hajde që ta rregullojmë të gjithë së bashku”, tha Rama, duke theksuar se universitetet janë aleatë kyç të shtetit në procesin e integrimit europian.

Sipas tij, investimet e Bashkimit Europian në arsimin e lartë, veçanërisht për Universitetin e Tiranës, duhet të shfrytëzohen më mirë.

“Duhet ta vlerësojmë më shumë këtë kapacitet dhe ta vendosim në kushtet që të jetë më efikas në territor”, u shpreh kryeministri, duke ndalur edhe te rëndësia e procesit të akreditimit. “Ambicia tani është që ta çojmë në një nivel tjetër dhe të rrisim kapacitetin institucional për të përshpejtuar çështjen e akreditimit”, shtoi ai.

Kreu i qeverisë po ashtu theksoi se ka ardhur koha për ndryshime në ligjin për arsimin e lartë, i cili sipas tij ka nevojë të përshtatet me zhvillimet e kohës.

“Është koha për të rivizatuar ligjin e arsimit të lartë, pasi ka kaluar një periudhë e mjaftueshme për të reflektuar ndryshimet që ka sjellë koha dhe konstatimet e praktikës”, deklaroi Rama.

Ai bëri të ditur se ndryshimet do të hartohen nga një grup ekspertësh dhe synohet që të miratohen brenda këtij sesioni parlamentar.

“Ma ha mendja nuk do të presim sesionin tjetër të parlamentit për ta përgatitur bazën e ndryshimeve”, u shpreh ai.

Në përfundim, Rama nënvizoi se sfida kryesore e universiteteve shqiptare mbetet ndërkombëtarizimi dhe racionalizimi i burimeve, duke shtuar se Universiteti i Tiranës dhe institucione të tjera kanë rritur kapacitetet financiare përmes projekteve dhe partneriteteve europiane, jashtë buxhetit të shtetit.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)