“Mazhoranca po i bën mburojë politike Ballukut” Bardhi: Rrezikon deri në 35 vite burg

Kreu i grupit parlamentar të Partisë Demokratike, Gazment Bardhi, deklaroi pas mbledhjes së Këshillit të Mandateve se situata penale ndaj zv/kryeministres së pezulluar, Belinda Balluku, është rënduar ndjeshëm krahasuar me fazën fillestare të hetimeve.

Në një prononcim për mediat, Bardhi tha se SPAK ka bërë të ditur se, në momentin kur u kërkua masa ndaluese ndaj Ballukut, ajo rrezikonte një dënim maksimal deri në 10 vite burg. Sipas tij, aktualisht prokurorët janë shprehur se, nëse provohen të gjitha akuzat e ngritura, dënimi maksimal që ajo mund të përballet arrin deri në 35 vite burg.

“Kjo tregon se jemi në një situatë të rënduar sa i takon krimeve të kryera prej saj”, u shpreh Bardhi.

Ai kritikoi gjithashtu zhvillimin e mbledhjes së Këshillit të Mandateve me dyer të mbyllura, duke theksuar se nuk ka pasur asnjë vendim që seanca të mos ishte e hapur për mediat. Sipas tij, nuk kishte asnjë element surprizë që do të justifikonte një mbledhje pa praninë e gazetarëve.

Bardhi akuzoi mazhorancën se po i del në mbrojtje politike Ballukut, duke pretenduar se kryeministri Edi Rama ka urdhëruar anëtarët e Partisë Socialiste në këshill që të mbrojnë zv/kryeministren e pezulluar.

“SPAK konfirmoi se situata penale ndaj Ballukut është rënduar tepër krahasuar me masat e para që gjykata ka dhënë ndaj saj. Këto masa deri tani nuk mbrojnë dot hetimin e plotë ndaj Ballukut”, deklaroi deputeti demokrat, duke e cilësuar qëndrimin e mazhorancës si përpjekje për të penguar drejtësinë.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)