“Na vije si nuse, je viktima e Lubisë”, Spiropali përplaset me Berishën: Sali, ti s’lëviz dot një gur

Elisa Spiropali dhe krydemokrati Sali Berisha janë përplasur në seancën e sotme plenare për mënyrën si ajo u shkarkua nga detyra si ministre e Jashtme e vendit, në mbledhjen e Grupit të PS.

Spiropali u shpreh e habitur se si shkarkimin e saj e paralajmëroi Berisha në Parlament.

“Unë flas dhe gjuhë tjetër, më mirë se shqipen nuk flas asnjë gjuhë tjetër. Kam folur si duhet për Shqipërinë. Çdo detyrë është nder i madh. Jam e qartë dhe e qetë. Më vjen keq... Largimin e paralajmëroi Sali Berisha në Parlament. Vetëm për këtë jam e habitur që i doli fjala”, tha deputetja socialiste.

Berisha mori fjalën duke e cilësuar Spiropalin si viktimë të Belinda Ballukut dhe betejës për pushtet mes klaneve në Partinë Socialiste. Sipas Berishës Spiropali ka pretenduar postin e zv/kryeministres me largimin e Ballukut për shkak të problemeve me drejtësinë dhe prej kësaj aspirate e pësoi me shkarkimin si shefja e diplomacisë shqiptare.

“Je viktima më e parëndësishme e Lubisë dhe më e merituara. Në një kohë kur sytë e shqiptarëve drejtoheshin drejt asaj sikur të ishte korba e zezë, në fakt aty afër ishte, ti na vije si nuse këtu, e veshur me të bardha, me të gjitha aksesorët. Pse çfarë kujton ti se bar hante Lubia? Ndaj dhe nuk e ke nga Sali Berisha, jo, e ke nga vetja jote, se jo që nuk e mbroje, përkundrazi gëzoheshe se tani do bëheshe ti zëvendëskryeministre, nuk ta priste mendja se ishte kjo tjetra, kloni i Lubisë. Ja ku e ke klonin! Ti ke probleme të mëdha në shkenca. Kjo është kloni. Ndaj dhe nuk e ke nga Sali Berisha atë, se për Sali Berishën, Edi Rama të lartësonte njëlloj siç lartësoi këtë klonin e Lubisë, por e ke nga vetja jote se more përpjetë ti. Iku Lubia, the tani, ja shiheni, unë do jem Lubia juaj tani, u thoshte kjo. Dhe këta të dhanë atë që meritove”, ia ktheu Berisha, ish-ministres së Jashtme.

Spiropali replikoi sërish duke ironizuar fuqinë që ka kreu i PD, teksa tha se nuk ka asgjë në dorë, e aq më tepër të lëvizë ministra në qeveri me fjalën e tij.

“I nderuar kryetar replika ishte me deputetin Belind Këlliçi dhe jo me deputetin Sali Berisha që nuk I lë radhë deputetëve të tij të marrin fjalën këtu.  Unë tani replikën e kam me Sali Berishën. Nuk e dija por shkakton një lloj emocioni të caktuar të kthehem të bëj replikë me Berishën. Të gjithë e kanë nga vetja Sali, asnjë nuk e ka nga të tjerët. Të gjithë nga vetja e kanë, unë nga vetja, ti nga vetja. Dhe për veten vetëm mbajmë përgjegjësi mbi këtë dhe, kështu që ta bëjmë analizën, të shohim se ku jemi dhe ku ishim dhe të shohim edhe për të ardhmen. Por ti nëse bën analizën e vetes së të tjerëve që sigurisht ti s’ke asnjë përgjegjësi se ti nuk lëviz dot më një gur, jo më të lëvizësh njerëz nga qeveria, sigurisht që vetja është ajo që na sjell ku jemi dhe vetëm për veten mbajmë përgjegjësi. Për të tjerat mbajnë përgjegjësi ata që i bëjnë”, u shpreh Spiropali.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)