Zbardhet axhenda e Asamblesë Kombëtare të Partisë Socialiste në Durrës

“Përqendrimi në dialog me bazën”, “forcimi i bashkëpunimit me strukturat vendore” dhe “përgatitja për sfidat ekonomike të mundshme”. Këto ishin tre porositë kryesore që Kryeministri Edi Rama I dha socialistëve përpara Asamblesë Kombëtare të PS-së.

Këtë të shtunë, më 21 mars, socialistët do të mblidhen në qytetin e Durrësit për të zhvilluar Asamblenë. Kjo është një ngjarje që shënon nisjen zyrtare të fushatës zgjedhore për kryetarët e rinj të organizatave lokale të Partisë Socialiste. Takimi pritet të nisë nga ora 10:00 e paradites dhe mendohet se do të zgjasë deri në orën 15:00.

Në këtë Asamble Kombëtare, fjalën do ta mbajnë kryeministri Edi Rama dhe drejtues të tjerë të lartë politikë të socialistëve, ndërsa diskutimet do të përqendrohen tek dialogu me bazën dhe përgatitjet për procesin zgjedhor, që sipas Statutit të partisë zhvillohet çdo dy vjet.

Procesi zgjedhor për këtë vit do të fillojë me zgjedhjen e kryetarëve të organizatave vendore dhe do të vijojë me formimin e forumeve lokale të Partisë Socialiste. Ky proces përfshin të gjitha strukturat bazë të partisë dhe do të zgjasë deri më 12 qershor, datë kur PS-ja feston 35-vjetorin e krijimit.

Gjatë mbledhjes së Kryesisë më parë, Rama i kërkoi anëtarëve të Partisë të fokusohen në dialog të drejtpërdrejtë me bazën në bashkitë ku është më e nevojshme, të forcojnë bashkëpunimin me anëtarësinë dhe të jenë të gatshëm për çdo pasojë ekonomike, që mund të ndikojë situata ndërkombëtare, veçanërisht nga tensionet në Lindjen e Mesme.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)