"Drejtësia e re, e pavarur, por i mungon profesionalizmi", Rama: S’ka mërgatë qyqesh që ndal integrimin

Nga mbledhja e Asamblesë së PS në Durrës, kryeministri Edi Rama u kujdes të ndalej edhe tek beteja e fundit e ekzekutivit me gjyqësorin për çështjen “Ballukut”, teksa deklaroi se ai gjykon se sistemi i ri i drejtësisë në vend është tashmë i pavarur, por ende ka nevojë për rritje në aspektin e profesionalizmit dhe standardeve.

Sipas tij, pavarësia e drejtësisë është një arritje e rëndësishme, por nuk është e mjaftueshme për të garantuar një shtet funksional të së drejtës.

“Drejtësia sot është e pavarur dhe kjo është pak, sepse një drejtësi e pavarur nuk është e mjaftueshme për të garantuar një demokraci funksionale dhe shtet të së drejtës. Drejtësia duhet të jetë e paanshme dhe profesionale, në këto të tjerat ka shumë rrugë për të bërë akoma”, u shpreh Rama.

Rama nënvizoi gjithashtu se reformat janë ndërtuar mbi një sistem të trashëguar problematik dhe se institucionet e reja kërkojnë kohë për t’u konsoliduar.

“Institucionet demokratike, ndryshe nga fëmijët, nuk rriten aq shpejt… institucioneve u duhen shumë më tepër vite për të arritur standardet. Ne kemi dorëzuar shpatën e sistemit gjyqësor te sistemi gjyqësor… Ne jemi këtu vetëm për të bërë durim strategjik”, theksoi Rama.

Në lidhje me procesin e integrimit europian, kreu i qeveris hodhi poshtë akuzat e opozitës se Shqipëria ka ngecur në këtë rrugëtim.

Ai theksoi se negociatat për anëtarësim në Bashkimi Evropian kanë vijuar pa ndërprerje dhe se progresi i vendit është vlerësuar pozitivisht.

“Negociatat për anëtarësim në BE nuk kanë ndalur për asnjë sekondë… raporti i KE është i shkëlqyer për Shqipërinë”, u shpreh Rama.

Kryeministri përdori tone të forta ndaj opozitës, duke deklaruar se askush nuk mund ta pengojë Shqipërinë në këtë proces. “Nuk ka mërgatë qyqesh në Berlin apo Bruksel që e ndal Shqipërinë në këtë proces”, duke ju referuar turit të takimeve të deputetëve të PD në kancelaritë europiane.

Rama përfundoi duke theksuar se objektivi i qeverisë mbetet mbyllja e negociatave brenda mandatit të saj, pavarësisht kundërshtive politike.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)