“Alkooli, depresioni dhe tentativat për vetëvrasje”, rrëfimi prekës i ish-yllit të Inter

Nga ferri drejt ringritjes. Ish-mesfushori i Interit, Fredy Guarin, ka rrëfyer publikisht periudhën më të errët të jetës së tij, të shënuar nga depresioni, varësia nga alkooli dhe tre tentativa për t’i dhënë fund jetës.

“Si jam sot? Po fitoj betejën time”, thotë ish-futbollisti kolumbian, duke kujtuar vitet e vështira që nisën në fundin e aventurës së tij me Interin. Në një intervistë për “Corriere della Sera”, Guarin tregoi se problemet personale dhe familjare e shtynë drejt alkoolit.

“Fillova të pija gjatë muajve të fundit te Interi. Po kaloja një periudhë të vështirë, po ndahesha nga bashkëshortja dhe isha larg fëmijëve”, rrëfeu ai. Situata u përkeqësua më tej pas transferimit në Kinë dhe më pas në Brazil, ku pandemia Covid-19 i hoqi edhe të vetmen gjë që e mbante të lidhur me jetën: futbollin.

“Mbeta vetëm me veten time, pa asgjë tjetër”, rrëfeu Guarin. Ai kujtoi momentin kur kërkoi ndihmë, pasi ishte vetëm në shtëpi dhe nën efektin e alkoolit. “Po telefonoja njerëzit, askush nuk përgjigjej. Mendova t’i jepja fund gjithçkaje. Isha i lodhur nga jeta”.

Në atë moment, ai kontaktoi psikologen dhe agjentin e tij, çka shënoi edhe fillimin e rrugës drejt rehabilitimit. Guarin iu nënshtrua një programi në një fondacion, ku arriti të shkëputej nga alkooli dhe të rindërtonte jetën e tij.

Një hap i rëndësishëm në këtë proces ishte ribashkimi me fëmijët. “Nuk më falën menjëherë, por me kalimin e kohës më kuptuan”, thotë ai. Sot, Guarin punon në të njëjtin fondacion së bashku me psikologen e tij dhe synon të ndihmojë të tjerët. “Dua ta vë përvojën time në shërbim të njerëzve”, përfundon ish-mesfushori, duke dhënë një mesazh shprese për ata që përballen me errësirën e depresionit.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)