Duka kandidat i vetëm për kreun e FSHF, Blendi Fevziu e Anila Basha kandidate për anëtar të Komitetit Ekzekutiv

Procesi i përgatitjes për zgjedhjet në Federatën Shqiptare të Futbollit ka hyrë në fazën vendimtare, teksa Komisioni i Verifikimit ka përmbyllur shqyrtimin e kandidaturave dhe delegatëve për Asamblenë e Përgjithshme Zgjedhore. Mbledhja e radhës u zhvillua pas mbylljes së afatit zyrtar të dorëzimit të kandidaturave, në përputhje me Rregulloren e Asamblesë së Përgjithshme të FSHF.

Gjatë verifikimeve, Komisioni analizoi propozimet e paraqitura nga anëtarët e Asamblesë, duke vlerësuar përmbushjen e kritereve statutore, integritetin dhe përputhshmërinë me kërkesat ligjore të procesit zgjedhor. Në përfundim, u konstatua se 13 kandidatë për anëtarë të Komitetit Ekzekutiv kanë siguruar dy propozimet e nevojshme dhe plotësojnë kushtet për të qenë pjesë e garës.

Lista e kandidatëve për Komitetin Ekzekutiv, sipas rendit alfabetik, përfshin: Abdyl Kuriu, Anila Basha, Arben Dervishaj, Armando Cungu, Blendi Fevziu, Edmond Hasanbelli, Envi Hicka, Erind Resuli, Ervin Canollari, Geri Çipi, Gjergji Petro, Lutfi Nuriu dhe Pano Xhixho.

Sa i përket postit të Presidentit të FSHF-së, Komisioni bëri të ditur se është regjistruar kandidatura e Armand Dukës, e propozuar nga 33 anëtarë të federatës.

Ndërkohë, është zyrtarizuar edhe lista e delegatëve të anëtarëve të FSHF-së që do të marrin pjesë në Asamblenë e Përgjithshme, sipas numrit të përcaktuar në Vendimin nr. 1, datë 03.12.2025.

Asambleja e Përgjithshme Zgjedhore e FSHF do të mbahet më 16 shkurt 2026, në orën 10:00, në ambientet e “Shtëpisë së Futbollit”, ku do të zgjidhen Presidenti dhe anëtarët e Komitetit Ekzekutiv për mandatin e ri katërvjeçar.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)