Ekipi turk që theu logjikën e merkatos, bleu 22 lojtarë për… 2 orë

Pas përfundimit të afatit të transferimeve të dimrit në ligat më të mëdha europiane, ia vlen të rikujtohet një ndodhi që bëro mjaft bujë në merkaton e futbollit. Protagonist ishte klubi turk i Elazigspor-it, që militonte në Ligën e Parë, ose ndryshe niveli i dytë i futbollit në vend.

Në janarin e vitit 2019, merkato e riparimeve në mesin e sezonit në Turqi u trondit nga një ngjarje e pazakontë. Klubi nga qyteti i Elazig, në pjesën aziatike të vendit, realizoi plot 22 blerje futbollistësh, në vetëm dy orë. Gjithçka ndodhi në ditën e fundit të merkatos.

Një numër kaq i madh transferimesh është i rrallë në vetvete kur kryhet edhe në verë, atëherë kur nisin projektet e reja dhe ka kohë për të guxuar të ndryshosh gjithçka në skuadër. Por, mënyra dhe shpejtësia me të cilën Elazigspor i kreu transferimet, e bëjnë këtë rast pothuajse unik në botë.

Klubi publikoi një seri njoftimesh në rrjetet sociale zyrtare, duke “përmbytur” profilin e tij në Tëitter me emra të rinj. Nga 22 lojtarët e afruar, 12 ishin transferime me kontrata afatgjata, ndërsa 10 futbollistë të tjerë në formë huazimi. Kjo bëri që përbërja e skuadrës të ndryshonte rrënjësisht në pak orë.

Arsyeja që fshihet pas ditës së “çmendur” në merkato ishte e thjeshtë: Elazigspor ishte dënuar nga Federata Turke dhe nuk ishte në gjendje të afronte lojtarë të rinj. Pasi zgjidhën problemet me pagesat dhe çështjet burokratike, merkato për klubin u zhbllokua vetëm në orët e fundit të merkatos.

Sapo u hoq dënimi, drejtuesit e klubit reaguan menjëherë. Presidenti i Elazigsporit e quajti këtë një “sipërmarrje të jashtëzakonshme”. Në fakt ai mbetet një operacion i rrallë në futbollin modern, që e bën Elazigspor-in protagonist absolut të merkatos në Turqi dhe në Europë.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)