Katër muaj para Botërorit 2026, tifozët këshillohen të mos udhëtojnë në Meksikë

Kupa e Botës 2026 është përfshirë nga pasiguria, pasi Meksika, një nga tre vendet organizatore të turneut së bashku me SHBA-në dhe Kanadanë, po përballet me trazira të rënda civile pas eliminimit të bosit të kartelit më të fuqishëm të drogës. Nemesio Rubén Oseguera Cervantes, i njohur si “El Mencho” dhe lider i Kartelit Jalisco New Generation, u vra gjatë një operacioni ushtarak në shtetin Jalisco.

Pas vrasjes së tij, anëtarët e kartelit nisën sulme hakmarrëse në Guadalajara, një nga qytetet që gjatë verës do të presë ndeshje të Botërorit 2026. Sipas raportimeve, persona të armatosur pushtuan zona të ndryshme të qytetit, duke përfshirë aeroportin e Guadalajaras. Aty u panë turistë që largoheshin mes panikut, teksa dëgjoheshin të shtëna armësh.

Bandat kriminale ngritën qindra postblloqe, dogjën automjete dhe paralizuan pjesë të tëra të qytetit, duke e kthyer atë në një skenë që dëshmitarët e përshkruan si “zonë lufte”. Guadalajara, qyteti i dytë më i madh në Meksikë, së bashku me Mexico City dhe Monterrey do të presin 13 ndeshje të Kupës së Botës.

Nëse kualifikohet nga “play-off”, edhe Shqipëria mund të luajë një ndeshje në Monterrey, në Grupin F ku si rivalë janë Holanda, Japonia dhe Tunizia. Sipas programit, pas 108 ditësh Meksika pritet të organizojë dy ndeshjet e para të turneut, në datat 11 dhe 12 qershor. Guvernatori i Jalisco-s, Pablo Lemus Navarro, shpalli gjendjen e emergjencës. Aktivizimi i “kodit të kuq” ka pezulluar transportin publik, ngjarjet masive dhe prezencën fizike në shkolla.

Për shkak të përshkallëzimit të situatës, SHBA, Britania e Madhe dhe Kanadaja paralajmëruan qytetarët e tyre, duke i këshilluar të shmangin udhëtimet drejt Guadalajaras dhe zonave përreth. Autoritetet u kanë bërë thirrje atyre që ndodhen në zonë të qëndrojnë në ambiente të sigurta. Situata e krijuar ka ngritur pikëpyetje serioze mbi sigurinë në prag të Botërorit 2026.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)