Katër humbje radhazi, Tirana zhytet në fund, Bylis fiton me Vorën dhe e parakalon në renditje

Elbasani vazhdon të ëndërrojë titullin kampion në Kategorinë Superiore. Verdheblutë kanë marrë një tjetër fitore të rëndësishme, duke mposhtur Tiranën me rezultatin 0-1 në stadiumin “Selman Stërmasi”.

Skuadra e drejtuar nga Ivan Gvozdenoviç arriti të marrë tre pikë të arta falë golit të Ze Gomes në fundin e pjesës së parë. Ky gol rezultoi vendimtar për fatin e takimit.

Në pjesën e dytë, bardheblutë e drejtuar nga Orges Shehi u përpoqën të reagojnë dhe krijuan disa raste për të rikthyer baraspeshën. Rasti më i mirë erdhi nga Mehmeti, por tentativa e tij u ndal nga traversa, duke i mohuar Tiranës golin e barazimit.

Me këtë sukses, Elbasani vazhdon të mbajë gjallë shpresat për titullin kampion, ndërsa Tirana thellon krizën e rezultateve. Bardheblutë numërojnë tashmë katër humbje radhazi dhe gjenden në zonën e ftohtë të renditjes.

Një fitore shumë të rëndësishme arriti edhe Bylis, që mposhti Vorën me rezultatin minimal 1-0 në sfidën e javës së 27-të të Kategorisë Superiore.

Pjesa e parë e takimit u mbyll pa gola, me të dy skuadrat që treguan kujdes në lojë. Në fraksionin e dytë, skuadra e drejtuar nga Mirel Josa shtoi presionin në kërkim të golit.

Bylis krijoi disa raste të mira, por portieri i Vorës, Harizaj, u tregua vendimtar duke ndalur disa tentativa të rrezikshme. Kur dukej se ndeshja do të mbyllej në barazim, erdhi momenti vendimtar.

Në minutën e 88-të, Adepoju arriti të mposhtë portierin kundërshtar dhe të shënojë golin e vetëm të takimit, duke i dhënë tri pikë të arta skuadrës ballshiote.

Falë kësaj fitoreje, Bylis parakalon Vorën në renditje dhe del nga zona e ftohtë, duke u ngjitur në vendin e 7 me 27 pikë. Ndërkohë, Vora zbret në vendin e 8-të me një pikë më pak.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)