Tragjedi në futbollin kosovar: Lojtari veteran Liridon Gubetini ndërron jetë gjatë ndeshjes

Një ngjarje e rëndë ka tronditur futbollin e Kosovës. Lojtari i klubit të veteranëve KFV Barileva, Liridon Gubetini ka ndërruar jetë në moshën 43-vjeçare gjatë një ndeshjeje futbolli.

Sipas informacioneve paraprake, Gubetini ka humbur ndjenjat pas përfundimit të pjesës së parë të ndeshjes së Kupës mes KFV Barileva dhe KFV Deçani. Pavarësisht ndërhyrjes dhe përpjekjeve për ta ndihmuar, ai ka ndërruar jetë më pas. Sipas mediave në Kosovë, dyshohet se tragjedia erdhi si pasojë e një ataku kardiak.

Lajmi është konfirmuar nga klubi KFV Barileva përmes një reagimi zyrtar, ku është vlerësuar kontributi i tij i vazhdueshëm në skuadër dhe përkushtimi shumëvjeçar në futbollin e veteranëve. “Në këto momente të rënda, i shprehim ngushëllimet më të sinqerta familjes Gubetini, komunitetit sportiv dhe të gjithë miqve e bashkëlojtarëve që patën fatin ta njohin”, thuhej në njoftimin e klubit.

KFV Barileva theksonte se Gubetini do të mbahet mend si një figurë e respektuar dhe pjesë e rëndësishme e ekipit që nga krijimi i skuadrës së veteranëve. “Liridoni do të kujtohet gjithmonë si një njeri i respektuar dhe i përkushtuar, pjesë e klubit tonë që nga dita e parë e themelimit të skuadrës së veteranëve”, vijonte reagimi.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)