“Çmenduri” e FIFA-s: Finalja e Botërorit 2026, çmimi i biletave shkon deri në 2.3 milionë dollarë

Çmimet e biletave për finalen e Kupës së Botës kanë arritur nivele rekord, me disa vende që shiten deri në 2.3 milionë dollarë për një biletë të vetme në platformën zyrtare të rishitjes së FIFA-s. Ndeshja finale do të zhvillohet më 19 korrik në “MetLife Stadium” në New Jersey, ku katër vende në tribunën e poshtme janë listuar me çmimin 2.299.998,85 dollarë secila.

FIFA nuk vendos kufij për çmimet në tregun sekondar të biletave, por përfiton komision prej 15% si nga blerësi ashtu edhe nga shitësi, që do të thotë se për një biletë 2.3 milionë dollarëshe, Federata Botërore përfiton rreth 690 mijë dollarë.

Çmime ekstreme në të gjithë sektorët

Edhe pjesët e tjera të stadiumit kanë çmime shumë të larta. Një vend në tribunën e poshtme kushton mbi 200 mijë dollarë, ndërsa në zonat më të larta çmimet zbresin nga rreth 138 mijë dollarë, deri në afro 23 mijë dollarë, në varësi të vendit.

Biletat më të lira për finalen fillojnë nga rreth 10.900 dollarë, për vendet në pjesën e sipërme të stadiumit pas portës. Në krahasim me Botërorin e vitit 2022, rritja është shumë e madhe: atëherë çmimi më i lartë ishte rreth 1.600 dollarë.

Një treg pa kufizime çmimesh

Ndryshe nga më parë, FIFA ka hequr kufizimet për rishitjen e biletave, duke lejuar që çmimet të përcaktohen nga tregu i lirë. Kjo ka bërë që çmimet të rriten ndjeshëm në platformën zyrtare.

Edhe ndeshjet e tjera të turneut kanë çmime të larta: gjysmëfinalet variojnë nga 9 mijë deri në 11 mijë dollarë, ndeshjet e grupeve të SHBA-së nga 1.900 deri në 4.100 dollarë, ndërsa çerekfinalet arrijnë deri në 5.700 dollarë.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)