“43% më tepër dietë ushqimore”, ministri Gonxhja njofton rritjen e shpërblimeve për sportistët elitarë

Qeveria ka miratuar një paketë të re masash për sportin elitar, që parashikon rritje të ndjeshme të shpërblimeve dhe mbështetjes financiare për sportistët dhe trajnerët. Ministri për Turizmin, Kulturën dhe Sportin, Blendi Gonxhja bëri të ditur se vendimi synon përmirësimin e skemës së financimit në sport dhe rritjen e motivimit për rezultatet ndërkombëtare.

Sipas tij, një nga ndryshimet kryesore është rritja e trajtimit ditor ushqimor për sportistët elitarë, i cili rritet me 43%, duke kaluar nga 3,500 lekë në 5,000 lekë të reja në ditë.

Në paketën e re parashikohen gjithashtu rritjet e mëposhtme:

-me 25% shpërblimi për trajnerët e sportistëve elitarë

-me 75% mbështetja për sportet jo olimpike

-deri në 65% për stile të veçanta sportive

-deri në 100% për rezultatin përfundimtar

“Në total shpërblimi mund të shkojë në rast se del në rezultatet më të larta sipas skemës deri në 230%. Ka një rritje deri në 200% ose trefishim për disa kategori rezultatesh në kampionate europiane. Ka një rritje mesatare në 50 deri në 100% në përgjithësi për të gjitha rezultat e tjera. Ka një rritje 100% ose dyfishim për kategori lojërash olimpike dhe kampionate botërore me rritje për gara mesdhetare dhe ato ballkanike”, tha ministri Blendi Gonxhja.

Sipas ministrit, në disa raste shpërblimet mund të rriten ndjeshëm në varësi të suksesit sportiv, duke synuar një sistem më të diferencuar dhe më motivues për atletët shqiptarë. Qeveria thekson se këto ndryshime kanë për qëllim forcimin e sportit elitar dhe përmirësimin e kushteve për sportistët që përfaqësojnë Shqipërinë në arenën ndërkombëtare.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)