Themeluesi ndërroi jetë, një grua merr drejtimin e OnlyFans

Pas vdekjes së miliarderit Leonid Radvinsky në moshën 43-vjeçare nga një sëmundje terminale, drejtimi i platformës së njohur për përmbajtje për të rritur OnlyFans ka kaluar zyrtarisht në duart e bashkëshortes së tij, Yekaterina Chudnovsky.

Sipas dokumenteve zyrtare britanike, Chudnovsky ka marrë kontrollin e kompanisë “Fenix International”, duke trashëguar një nga bizneset digjitale më fitimprurëse në botë.

42-vjeçarja nuk është një emër i panjohur në botën e biznesit dhe teknologjisë. E diplomuar në universitetet Northwestern dhe DePaul, ajo punon si avokate korporative në sektorin teknologjik dhe mban poste në bordet drejtuese të disa kompanive.

Burime pranë familjes kishin deklaruar më herët për “Forbes” se Chudnovsky konsiderohej partnerja reale e biznesit të Radvinskyt. Çifti ishte martuar në vitin 2008 dhe kanë katër fëmijë.

Sipas dokumenteve të regjistruara në Britaninë e Madhe, ajo zotëron tashmë të paktën 75% të aksioneve dhe të drejtave të votës në “Fenix International”, si edhe kompetencën për të emëruar apo shkarkuar shumicën e bordit drejtues të kompanisë.

Vetëm gjatë vitit të kaluar, OnlyFans gjeneroi rreth 1.5 miliardë dollarë të ardhura dhe mbi 700 milionë dollarë fitim. Platforma regjistroi 7.2 miliardë dollarë transaksione bruto në vitin 2024 dhe numëron rreth 4.6 milionë krijues aktivë përmbajtjesh. Modeli i biznesit të kompanisë bazohet në mbajtjen e 20% të fitimeve të çdo krijuesi.

Radvinsky kishte blerë 75% të “Fenix International” në vitin 2018 nga themeluesi Tim Stokely dhe babai i tij, për rreth 30 milionë dollarë. Nën drejtimin e tij, platforma u fokusua fuqishëm te përmbajtjet për të rritur dhe përjetoi rritje të jashtëzakonshme gjatë pandemisë.

Në momentin e vdekjes, revista Forbes e vlerësonte pasurinë e Radvinskyt në rreth 4.7 miliardë dollarë, pothuajse e gjitha e lidhur me aksionet në “Fenix International”.

Megjithatë, trashëgimtarja e re e perandorisë së OnlyFans do të përballet edhe me sfida të mëdha ligjore dhe rregullatore. Në Britaninë e Madhe janë ashpërsuar rregullat për verifikimin e moshës së përdoruesve, ndërsa në SHBA autoritetet financiare kanë raportuar më herët transaksione të dyshimta që lidhen me OnlyFans dhe platformën e mëparshme të Radvinskyt, MyFreeCams.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)