Po fluturonte për në Armeni, avioni i kryeministrit spanjoll bën ulje emergjente në Turqi

Avioni që po transportonte kryeministrin spanjoll Pedro Sanchez për në Jerevan, aty ku do të marrë pjesë në Samitin e 8-të të Komunitetit Politik Europian, ka pësuar një defekt në ajër, duke e detyruar të bëjë ulje emergjente në Turqi.

El Pais raporton se problemi u regjistruar teksa Sanchez ishte rrugës për në Armeni. Burime qeveritare kanë raportuar për median spanjolle se një defekt teknik e detyroi aeroplanin të ndiqte protokollin dhe të ulej në Ankara, ku Sanchez do të kalojë natën përpara se të rifillojë udhëtimin e tij për në Armeni herët të hënën në mëngjes.

Airbus A310 që transportonte Sanchez-in dhe pjesën tjetër të delegacionit të tij u nis nga baza ajrore Torrejón de Ardoz në Madrid pak para orës katër të pasdites, me destinacion kryeqytetin e Armenisë, ku gati pesëdhjetë udhëheqës nga vendet që i përkasin këtij forumi do të takohen këtë të hënë.

Burime qeveritare kanë raportuar për El Pais se një defekt teknik, të cilin ata e kanë minimizuar rëndësinë, i ka detyruar të ndjekin protokollin dhe se do të largohen nga Ankaraja pasi incidenti të jetë zgjidhur.

Ky është incidenti i dytë që përfshin një avion zyrtar të Spanjës, pasi më 4 shtator të vitit të kaluar avioni Falcon me të cilin Pedro Sanchez po fluturonte për në Paris për të marrë pjesë në një takim të Koalicionit të Vullnetarëve për Ukrainën u detyrua të kthehej prapa në gjysmë të rrugës për shkak të një defekti.

Sakaq, mbërritja e Sanchez në samitin e Jerevanit është planifikuar për në orën 8:15 të së hënës.

Në këtë takim pritet të marrin pjesë pothuajse 50 udhëheqës shtetesh, mes tyre edhe kryeministri shqiptar Edi Rama dhe kreu i ekzekutivit të Kosovës, Albin Kurti.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)