Finlanda në alarm, droni shkel hapësirën ajrore

Një dron i paidentifikuar dyshohet se ka hyrë në hapësirën ajrore të Finlandës, në zonën e Virolahti, pranë kufirit me Rusinë, në orët e para të mëngjesit të 3 majit.

Sipas Ministrisë finlandeze të Mbrojtjes, droni është pikasur nga Forcat Ajrore, por deri tani nuk është bërë e mundur identifikimi i modelit apo origjinës së tij. Autoritetet bëjnë të ditur se mjeti pa pilot nuk ndodhet më në hapësirën ajrore të vendit.

Rasti është marrë në hetim nga roja kufitare finlandeze, ndërsa nuk janë dhënë detaje të tjera mbi natyrën e incidentit apo qëllimin e mundshëm të dronit.

Finlanda ka një kufi të gjatë prej rreth 1.340 kilometrash me Rusinë, çka e bën këtë zonë veçanërisht të ndjeshme për çështje sigurie. Incidenti vjen në një kohë tensionesh të larta në rajon.

Ndërkohë, Ministria ruse e Mbrojtjes ka deklaruar se ka rrëzuar qindra dronë ukrainas në rajone të ndryshme, përfshirë zonën pranë Shën Petersburg, jo shumë larg kufirit finlandez.

Raste të ngjashme janë regjistruar edhe më herët. Në muajin mars, Ukraina kërkoi falje pasi dy dronë të saj ranë në territorin finlandez, me gjasë si pasojë e devijimit nga kursi.

Gjithashtu, disa vende evropiane kanë raportuar më parë për shkelje të dyshuara të hapësirës ajrore nga Rusia, duke rritur shqetësimet për sigurinë në rajon.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)