Ukraina sulmon dy anijet ruse me naftë, Zelensky: Ishin pjesë e flotës hije

Presidenti i Ukrainës, Volodymyr Zelensky ka njoftuar se forcat ukrainase kanë goditur dy anije cisternë ruse në ujërat pranë portit Novorossiysk, të cilat përdoreshin për transportin e naftës.

Në një mesazh të publikuar në rrjetin social Telegram, Zelensky tha se anijet i përkisnin të ashtuquajturës “flotë hije” të Rusisë. Sipas tij, kjo flotë përdoret për të shmangur sanksionet ndërkombëtare dhe për të vazhduar eksportin e naftës.

“Forcat tona po vazhdojnë të zbatojnë sanksione ndaj flotës së fshehtë ruse të naftës. Dy prej këtyre anijeve janë goditur në hyrje të portit të Novorossiysk,” u shpreh Zelensky.

Ai gjithashtu falënderoi strukturat e sigurisë dhe marinën ukrainase për operacionin, duke përmendur rolin e shërbimeve të kundërzbulimit dhe drejtimin e operacionit në terren.

Ky zhvillim vjen në kuadër të përpjekjeve të vazhdueshme të Ukrainës për të goditur kapacitetet ekonomike dhe logjistike të Rusisë, veçanërisht në sektorin e energjisë, i cili konsiderohet jetik për financimin e luftës.

Deri më tani nuk ka reagim zyrtar nga pala ruse lidhur me këtë incident.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)