“Humbja e dy engjëjve, dhimbje për gjithë Durrësin”, kryebashkiakja Sako kërkon reflektim pas aksidentit

Qyteti i Durrësit u trondit këtë të diel nga aksidenti tragjik i shkaktuar nga një drejtues mjeti në gjendje të dehur, që i mori jetën dy fëmijëve dhe la një të tretë në gjendje kritike për jetën.

Kryebashkiakja e Durrësit, Emirjana Sako, ka reaguar përmes një mesazhi ngushëllimi në rrjetet sociale, duke e cilësuar të sotmen si një ditë zie për të gjithë qytetin.

“Humbja e jetës së dy engjëjve sot është kthyer në ditë zie për gjithë Durrësin. Si nënë, ndaj dhimbjen e jashtëzakonshme me familjarët e fëmijëve dhe u shpreh ngushëllimet më të sinqerta”, shprehet Sako.

Ajo ka bërë gjithashtu thirrje për lutje dhe solidaritet për fëmijën e tretë që ndodhet në gjendje të rëndë në spital.

“Lutemi së bashku për djalin që ndodhet në Spitalin e Traumës, që të kalojë këtë moment të vështirë dhe të rikthehet sa më shpejt pranë familjes së tij.”

Në reagimin e saj, kryebashkiakja thekson se kjo tragjedi duhet të shërbejë si një moment reflektimi për të gjithë shoqërinë.

“Ky aksident i rëndë duhet të shërbejë si thirrje për reflektim të thellë, jo vetëm për institucionet, por për të gjithë ne si individë, prindër, qytetarë dhe shoqëri. Qofshin të parajsës.”

Ngjarja ndodhi në zonën e ish-Kënetës, ku katër fëmijë po luanin në trotuar pranë banesës së tyre. Një automjet tip “Mercedes Benz ML”, i drejtuar nga 57-vjeçari Nikollë Radaçi, përplasi tre prej tyre, ndërsa një i katërt arriti të shpëtojë pa lëndime.

Dy fëmijë humbën jetën menjëherë në vendngjarje, ndërsa i treti u transportua me urgjencë në Spitalin e Traumës, ku po lufton për jetën.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)