Tragjedi në Durrës, makina përplas 3 fëmijë, 2 humbin jetën

Një aksident tragjik ka ndodhur mesditën e kësaj të diele në zonën e ish-Kënetës, në Durrës, ku një automjet ka përplasur tre fëmijë të mitur, rreth 10 vjeç.

Sipas informacioneve paraprake, dy prej fëmijëve kanë humbur jetën si pasojë e plagëve të rënda të marra, ndërsa një i tretë ndodhet në gjendje kritike shëndetësore dhe është transportuar drejt Spitalit të Traumës për trajtim më të specializuar.

Në vendngjarje kanë mbërritur menjëherë shërbimet e emergjencës dhe forcat e policisë, të cilat po punojnë për zbardhjen e plotë të rrethanave të aksidentit.

Drejtuesi i automjetit, një shtetas me inicialet N. R., rreth 57 vjeç dhe banor i zonës, është ndaluar nga policia dhe është shoqëruar në komisariat për veprime të mëtejshme procedurale.

Dyshohet paraprakisht se ai mund të ketë qenë nën efektin e alkoolit në momentin e aksidentit.

Foto: Newsmax Balkans

Sipas të dhënave nga terreni, fëmijët ndodheshin në anë të rrugës në momentin kur automjeti është drejtuar drejt tyre dhe i ka përplasur.

Policia e Durrësit ka dhënë edhe një njoftim zyrtar lidhur me ngjarjen. “Rreth orës 14:20, në lagjen nr. 15, në Durrës, një automjet i drejtuar nga shtetasi N. R., rreth 57 vjeç, ka aksidentuar tre fëmijë të mitur, të moshës rreth 10 vjeç. Si pasojë e aksidentit, dy prej të miturve kanë humbur jetën, ndërsa i mituri tjetër është në gjendje të rëndë dhe po transportohet për ndihmë më të specializuar në Tiranë. Drejtuesi i automjetit është shoqëruar në Komisariat për veprime të mëtejshme”, thuhet në njoftim.

Autoritetet ndërkohë vijojnë hetimet për të sqaruar plotësisht shkaqet dhe dinamikën e aksidentit tragjik.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)