Alarm në Atlantik, shpërthen hantavirusi në një anije turistike, tre të vdekur

Organizata Botërore e Shëndetësisë njoftoi të dielën tre vdekje të lidhura me një shpërthim të mundshëm të hantavirusit, një sëmundje e transmetuar te njerëzit nga brejtësit, në një anije turistike në Oqeanin Atlantik.

“OBSH është informuar për një incident të shëndetit publik që përfshin një anije turistike që lundronte në Oqeanin Atlantik dhe po ofron mbështetje. Deri më sot, një rast i infeksionit me hantavirus është konfirmuar në laborator dhe pesë raste të tjera të dyshuara janë të njohura”, thuhet në reagimin e OBSH për situatën.

Sakaq, OBSH konfirmoi për AFP se nga gjashtë personat e infektuar, tre kanë vdekur dhe një është aktualisht në kujdes intensiv në Afrikën e Jugut. Një pasagjer 70-vjeçar i anijes turistike ishte i pari që shfaqi simptoma. Ai vdiq në bord dhe trupi i tij ndodhet aktualisht në ishullin e Shën Helenës, një territor britanik në Oqeanin Atlantik Jugor.

Gruaja e tij 69-vjeçare u sëmur gjithashtu në bord dhe u dërgua në Afrikën e Jugut, ku vdiq në një spital të Johanesburgut, tha burimi, duke shtuar se kombësitë e viktimave nuk dihen ende.

Sipas një burimi, një çift holandez është midis tre të vdekurve, ndërsa viktima e tretë besohet të jetë ende në anije.

Një burrë 69-vjeçar britanik po trajtohet në Johannesburg, siç konfirmuan më pas autoritetet e Afrikës së Jugut. Sipas një burimi të paidentifikuar, po zhvillohen diskutime për të përcaktuar nëse dy persona të tjerë të sëmurë do të vendosen në izolim në një spital në Kepin e Gjelbër, pas së cilës anija mund të vazhdojë udhëtimin e saj për në Ishujt Kanarie, një udhëtim dy ose tre-ditor.

“Edhe pse i rrallë, hantavirusi mund të transmetohet nga një person në tjetrin dhe të shkaktojë sëmundje të rënda të frymëmarrjes. Kërkohet monitorim i afërt i pacientëve, mbështetje dhe trajtim i përshtatshëm. Hetime të hollësishme janë duke u zhvilluar, duke përfshirë analiza të mëtejshme laboratorike dhe hetime epidemiologjike. Kujdes dhe mbështetje mjekësore po u ofrohet pasagjerëve dhe ekuipazhit. Sekuencimi i virusit është gjithashtu duke u zhvilluar”, shtoi më tej OBSH.

Anija turistike, MV Hondius, po lundronte nga Ushuaia e Argjentinës, për në Kepin e Gjelbër. Ajo u pa të dielën pak jashtë portit të Praias, kryeqytetit të këtij shteti. MV Hondius mund të akomodojë afërsisht 170 pasagjerë dhe ka afërsisht 70 anëtarë të ekuipazhit.

Çfarë është Hantavirusi?

Hantavirusi i referohet një lloji virusi të bartur nga brejtësit që transmetohet te njerëzit kryesisht përmes thithjes së grimcave ajrore nga jashtëqitjet e thata të brejtësve. Infeksionet zakonisht ndodhin kur virusi përhapet në ajër nga urina, jashtëqitjet ose pështyma e një brejtësi, sipas Qendrave për Kontrollin dhe Parandalimin e Sëmundjeve.

Në raste të rralla, virusi mund të transmetohet edhe përmes pickimeve ose gërvishtjeve të brejtësve.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)