Në kufirin mes “Parajsës dhe Ferrit”

Ndërsa qielli mbi ta mbushej me zhurmën e avionëve luftarakë që patrullonin për të neutralizuar valë dronësh dhe raketash iraniane, turistë dhe banorë të huaj në Dubai vijonin të shijonin diellin në plazh. Vetëm rreth 160 kilometra larg, përtej ujërave të Gjirit, ndodhet bregdeti i Iran, ndërsa konflikti në rajon vazhdon të përshkallëzohet.

Në plazhin Jumeirah, nën hijen e hotelit ikonik Burj Al Arab, i cili u godit gjatë sulmeve ajrore në fundjavë, qindra persona dukeshin të qetë. Edhe pamjet e konsullatës amerikane në flakë një natë më parë nuk i penguan pushuesit të qëndronin pranë detit. Autoritetet e Emirateve të Bashkuara Arabe kanë këmbëngulur se situata është nën kontroll, ndërsa kufizimet për të qëndruar brenda janë lehtësuar gradualisht.

Hotelet rihapën pishinat në ajër të hapur, klubet e plazhit pritën sërish vizitorë, ndërsa nga aeroporti ndërkombëtar i Dubait rifilluan disa fluturime të kufizuara. Edhe në qendrën tregtare Mall of the Emirates, pista e brendshme e skive vazhdonte të tërhiqte familje, pavarësisht temperaturave mbi 34 gradë jashtë.

Megjithëse disa dronë iranianë arritën të depërtojnë mbrojtjen ajrore, duke shkaktuar tre viktima dhe mbi 60 të plagosur, ritmi i sulmeve është ulur krahasuar me fundjavën e parë të përplasjes. Në plazh, shumë pushues shprehën besim të plotë te sistemet mbrojtëse të Emirateve.

Dune Barker, 34 vjeç, me origjinë nga Afrika e Jugut dhe banor prej 12 vitesh në Dubai, tha se nata e parë ishte e frikshme, por më pas kuptuan se shumica e raketave dhe dronëve po interceptoheshin.

“Vendi im nuk është aq i sigurt sa Emiratet,” u shpreh ai, duke shtuar se ndihet i qetë. Turisti spanjoll Jorge Prieto, 49 vjeç, i cili me familjen e tij duhej të kthehej në Francë, tha se ndihen të sigurt dhe po ndjekin këshillat e autoriteteve vendase. Ai shtoi se nuk ka arritur të marrë përgjigje nga ambasadat evropiane dhe po mbështetet te informacionet e qeverisë së Emirateve.

Edhe çifti nga Letonia, Pawel dhe Nataly, fillimisht të frikësuar nga shpërthimet, vendosën të dalin sërish jashtë pas disa ditësh, ndërsa autoritetet letoneze u kanë bërë të ditur se qëndrimi shtesë në hotel do të mbulohet nga pala vendase.

Mes pushimeve luksoze dhe sirenave të luftës, Dubai shfaq një kontrast të fortë, një “parajsë” turistike në hijen e një konflikti që vazhdon.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)