“Spiunoi tek Izraeli”, Irani ekzekuton një shtetas suedez

Një shtetas suedez është ekzekutuar në Iran, pasi ishte dënuar me vdekje për akuza spiunazhi në favor të Izraelit, duke shkaktuar reagime të forta nga Stokholmi zyrtar.

Ministria e Punëve të Jashtme e Suedisë konfirmoi lajmin për ekzekutimin, duke bërë të ditur se bëhet fjalë për një burrë të arrestuar në qershor të vitit 2025, në lidhje me një konflikt të armatosur 12-ditor. Autoritetet iraniane e akuzuan atë për spiunazh, ndërsa më pas u dënua me vdekje.

Ministrja e Jashtme e Suedisë, Maria Malmer Stenergard, e dënoi ashpër ekzekutimin, duke e cilësuar dënimin me vdekje si çnjerëzor dhe të pakthyeshëm. “Mendimet e mia janë me familjarët në këtë moment të vështirë. Dënimi me vdekje është mizor dhe i papranueshëm në çdo rrethanë”, deklaroi ajo.

Ajo theksoi gjithashtu se procesi gjyqësor ndaj shtetasit suedez nuk kishte garantuar standarde të drejta ligjore, duke ia atribuar përgjegjësinë e plotë autoriteteve iraniane. Sipas saj, Suedia kishte ngritur vazhdimisht këtë çështje në kontaktet me përfaqësuesit iranianë që nga momenti i arrestimit, duke kërkuar një gjykim të drejtë dhe shmangien e dënimit kapital.

Në reagim ndaj ngjarjes, Stokholmi ka thirrur ambasadorin e Iranit për sqarime zyrtare. Ndërkohë, autoritetet suedeze kanë paralajmëruar se do të vijojnë të dënojnë shkeljet e rënda të të drejtave të njeriut në Iran.

Identiteti i viktimës dhe vendndodhja e tij gjatë periudhës së paraburgimit nuk janë bërë publike, ndërsa rasti ka rritur më tej tensionet diplomatike mes dy vendeve.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)