Tragjedi në resortin në Zvicër, era e fortë rrëzon kabinën e teleferikut

Era shumë e fortë në alpet zvicerane ka shkaktuar një aksident tragjik në një nga zonat turistike të skive në resortin e skive Engelberg, në kantonin Nidvaldo. Një kabinë teleferiku u rrëzua gjatë paradites së 18 marsit, duke shkaktuar vdekjen e një personi. Sipas policisë kantonale, në momentin e aksidentit viktima ndodhej e vetme brenda kabinës.

Autoritetet bëjnë të ditur se personi u nxor nga vendi i ngjarjes dhe iu dha ndihma e parë, por më pas ndërroi jetë për shkak të plagëve të rënda të marra nga përplasja. Aksidenti dyshohet të jetë shkaktuar nga erërat shumë të forta që goditën zonën alpine dhe që arritën deri në 130 kilometra në orë. Sipas mediave lokale, pamjet tregojnë momentin kur kabina humb stabilitetin dhe më pas rrotullohet disa herë në shpatin e mbuluar me borë përpara se të përplaset.

Policia kantonale ka marrë një telefonatë emergjente pak para orës 11:00. Kabina e teleferikut u rrëzua pak pas stacionit ndërmjetës dhe gjatë rënies është përmbysur disa herë, sipas autoriteteve. Segmenti i përfshirë në aksident është ai që lidh zonën Trübsee në lartësinë rreth 1,800 metra me stacionin Stand mbi 2,400 metra mbi nivelin e detit. Aktualisht impianti është mbyllur ndërsa kanë nisur hetimet për të sqaruar rrethanat e ngjarjes.

Erërat e forta kishin çuar edhe në anulimin e një gare që ishte planifikuar në zonën e skive, megjithatë teleferiku ishte ende në funksion. Zv.komandanti i policisë, Senad Sakic ka deklaruar se arsyeja pse impianti vazhdonte të funksiononte pavarësisht kushteve të motit është pjesë e hetimeve që po zhvillohen.

Një dëshmitar okular ka treguar për mediat lokale se ekipet e shpëtimit u përpoqën të reanimonin një person për të paktën 30 minuta. Megjithatë policia ka bërë të ditur se personi që ndodhej në kabinë dyshohet se ka humbur jetën menjëherë nga përplasja. Aksidenti është konfirmuar edhe nga drejtori ekzekutiv i stacionit të skive Titlis Bahnen, Norbert Patt si dhe nga policia kantonale.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)