Izraeli vret 11 persona në Liban, mes tyre 6 mjekë dhe një fëmijë

Të paktën 11 persona janë vrarë në jug të Libanit si pasojë e sulmeve ajrore izraelite, në një seri goditjesh që kanë ndodhur në distriktin e Tirit.

Mes viktimave raportohet se janë edhe disa punonjës shëndetësorë dhe një fëmijë.

Në fshatin Deir Qanoun en-Nahr janë konfirmuar 6 të vdekur, përfshirë 2 paramedikë dhe një fëmijë, ndërsa në një tjetër sulm në zonën Hannaouiyah janë vrarë 4 mjekë të tjerë. Një tjetër goditje në qytetin Nabatieh ka shkaktuar vdekjen e një personi tjetër.

Sulmet e fundit janë pjesë e një vale më të gjerë dhune në jug të Libanit, pavarësisht një armëpushimi të ndërmjetësuar nga Shtetet e Bashkuara që hyri në fuqi në mes të prillit dhe u zgjat më vonë me 45 ditë. Megjithatë, përplasjet midis Izraelit dhe grupit Hezbollah kanë vijuar.

Sipas autoriteteve libaneze, që nga përshkallëzimi i ri i konfliktit janë vrarë mbi 2,800 persona, janë plagosur më shumë se 8,000 të tjerë dhe mbi 1.6 milionë banorë janë zhvendosur, duke krijuar një krizë të thellë humanitare në vend.

Izraeli deklaron se sulmet synojnë grupin e armatosur Hezbollah, të cilin e akuzon për përdorim të infrastrukturës civile për qëllime ushtarake. Këto akuza janë hedhur poshtë nga qeveria libaneze, e cila ka denoncuar atë që e quan “shkatërrim sistematik” të sektorit shëndetësor.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)