OKB pranë kolapsit, Guterres iu kërkon anëtarëve të paguajnë kuotat

Sekretari i Përgjithshëm i Kombeve të Bashkuara, Antonio Guterres, ka paralajmëruar se OKB-ja ndodhet përballë rrezikut serioz të një kolapsi financiar, për shkak të mospagesës së kontributeve të detyrueshme nga shtetet anëtare.

Ai ka bërë të ditur se kriza financiare po thellohet dhe mund të çojë në ndërprerjen e programeve dhe aktiviteteve kryesore që në muajin korrik.

Në një letër drejtuar ambasadorëve të 193 vendeve anëtare, Guterres thekson se të gjitha shtetet duhet të përmbushin detyrimet e tyre financiare, ose në të kundërt, të rishikohen në mënyrë thelbësore rregullat financiare të organizatës për të shmangur falimentimin.

Ai nënvizoi se integriteti i sistemit të OKB-së varet nga respektimi i detyrimit ligjor për pagesën e kontributeve, ashtu siç parashikohet në Kartën e OKB-së.

Sipas Guterres, viti 2025 u mbyll me një nivel rekord pagesash të papaguara, që përbëjnë rreth 77 për qind të totalit të shumës së detyruar. Ai kritikoi gjithashtu rregullat aktuale financiare, sipas të cilave OKB-ja duhet t’u kthejë shteteve fondet e pashpenzuara, duke e cilësuar këtë si një “goditje të dyfishtë”, pasi organizata pritet të kthejë fonde që realisht nuk i ka marrë.

Paralajmërimi vjen në një kohë kur Shtetet e Bashkuara, kontribuuesi më i madh i OKB-së, kanë refuzuar të financojnë buxhetin e rregullt dhe misionet paqeruajtëse, si dhe janë tërhequr nga dhjetëra agjenci të OKB-së.

Presidenti amerikan Donald Trump ka deklaruar se OKB-ja nuk po shfrytëzon potencialin e saj dhe ka kritikuar atë që ai e quan shpërdorim të parave të taksapaguesve amerikanë.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)