Treni pa drejtues 2.5 kilometra i gjatë që përshkon shkretëtirën australiane

Në zemër të shkretëtirës australiane qarkullojnë disa nga trenat më të mëdhenj dhe më të avancuar në botë, të ndërtuar për të transportuar miliona tonë minerale nga minierat drejt porteve eksportuese. Industria minerare në Australi është një nga shtyllat kryesore të ekonomisë, duke përfaqësuar mbi 13% të Prodhimit të Brendshëm Bruto dhe rreth 65% të eksporteve të vendit.

Australia është prodhuesi më i madh në botë i litiumit dhe një ndër liderët globalë në prodhimin e hekurit, arit, niklit dhe zinkut. Për të transportuar këtë pasuri minerare në distanca të mëdha, kompanitë kanë investuar në teknologji hekurudhore gjigante.

Gjiganti minerar BHP krijoi trenin “Iron Ore”, i cili në testimet e para në vitin 2001 arriti një gjatësi rekord prej më shumë se shtatë kilometrash. Projekti u përdor për të testuar teknologjinë “Distributed Power”, ku lokomotivat shpërndahen përgjatë trenit dhe jo vetëm në pjesën e përparme.

Sot, trenat e BHP-së arrijnë deri në 2.5 kilometra gjatësi dhe përbëhen nga 264 vagona me kapacitet të lartë transporti. Kur janë të ngarkuar plotësisht me mineral hekuri, pesha e tyre shkon deri në 40 mijë tonë.

Ndërkohë, kompania tjetër minerare Rio Tinto ka shkuar edhe më tej me projektin “AutoHaul”, një sistem trenash plotësisht autonomë, pa drejtues.

Prej rreth shtatë vitesh, Rio Tinto operon deri në 53 trena automatikë me 240 vagona secili, që lëvizin çdo 18 minuta gjatë gjithë ditës mes minierave dhe porteve. Çdo tren transporton afro 28 mijë tonë mineral hekuri.

Drejtuesit e kompanisë thonë se sfida kryesore ishte rritja e kapacitetit të transportit pa mbingarkuar rrjetin hekurudhor apo ndërtuar linja të reja. Rezultati është një nga sistemet më moderne të transportit industrial në botë, që përshkon mijëra kilometra nëpër shkretëtirën australiane.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)