E rëndë në Kuçovë, i dyshuari i rrëmben armën efektivit dhe e plagos

Një punonjës policie ka mbetur i plagosur mbrëmjen e së hënës në Kuçovë, pasi u sulmua nga një 45-vjeçar gjatë shoqërimit nga patrulla.

Sipas njoftimit paraprak, rreth orës 19:00, shërbimet e policisë po transportonin shtetasin Zamir Skënderi 45 vjeç, nga Komisariati i Policisë Fier drejt ambienteve të Policisë në Kuçovë. Ai dyshohej për veprën penale “Prishja e qetësisë publike”.

Gjatë shoqërimit, 45-vjeçari është konfliktuar me efektivin e policisë A.T., 20 vjeç, dhe gjatë përplasjes i ka marrë armën e shërbimit, me të cilën e ka plagosur.

Efektivët e tjerë ndërhynë menjëherë duke neutralizuar autorin dhe duke i rimarrë armën. Efektivi i plagosur u transportua në spital për ndihmë mjekësore dhe, sipas autoriteteve, ndodhet jashtë rrezikut për jetën.

Gjatë kontrollit fizik ndaj të dyshuarit, policia deklaron se iu gjet e fshehur në trup një sasi lënde narkotike, e dyshuar kokainë.

Në vendngjarje po punon grupi hetimor dhe Agjencia e Mbikëqyrjes Policore, nën drejtimin e Prokurorisë, për të zbardhur plotësisht rrethanat e incidentit dhe për të verifikuar nëse janë zbatuar procedurat standarde gjatë shoqërimit të personit nga patrulla e policisë.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)