Laert Haxhiu humb betejën në Gjykatën e Lartë, mbetet në burg përjetë

Gjykata e Lartë ka lënë në fuqi dënimin me burgim të përjetshëm për Laert Haxhiu, duke rrëzuar rekursin e paraqitur prej tij kundër vendimit të Apelit të Posaçëm. Vendimi u mor nga trupa gjykuese e përbërë nga Ilir Panda, Sokol Binaj dhe Sandër Simoni.

Haxhiu u shpall fajtor për ngjarjen e njohur si “Masakra e Lushnjes”, e ndodhur në vitin 2017, ku mbetën të vrarë Zamir Latifi dhe Jurgen Hoxha, ndërsa u plagosën Bujar Turku dhe Marius Xhepexhiu. Për të njëjtën dosje janë dënuar me burgim të përjetshëm edhe Orgest Bilbili dhe Anterio Kaloshi.

Të dënuarit akuzohen për disa vepra të rënda penale, mes tyre “vrasje në rrethana cilësuese”, “kryerje e veprave penale në kuadër të grupit kriminal”, “mbajtje pa leje e armëve” dhe “prishje e qetësisë publike”.

Sipas hetimeve, Laert Haxhiu konsiderohet drejtues i një grupi kriminal që dyshohet se ka kryer një seri vrasjesh në Shqipëri dhe Greqi gjatë viteve 2018-2021. Në dosje përmendet edhe bashkëpunimi me të penduarin e drejtësisë, Artan Tafani.

Ndër krimet që i atribuohen grupit janë ekzekutimi i biznesmenit Çajup Selimi në Tepelenë më 1 qershor 2021, vrasja e Fridman Xhaferajt në Korçë, ekzekutimi i Alban Semakut, i njohur edhe si Elton Kinezi, si dhe atentati ndaj Albi Bashaliut në Peqin në dhjetor të vitit 2021.

Hetimet kanë zbuluar gjithashtu se Haxhiu dyshohet se ka urdhëruar edhe dy vrasje në Athinë: atë të Lulzim Qorrit në vitin 2018 dhe të Dikens Halilit në vitin 2021, persona të lidhur me grupet e trafikut të drogës.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)